Осы уақытқа дейін бағдарламаға қатысушылардың атында 5 жыл ішінде мүліктің болмауын арнайы мемлекеттік жүйенің көмегімен автоматты түрде тексерілді, – деп жазады Aikyn.kz.
Сол себепті атында қандай да бір мүлкі барларға теріс жауап келіп жүрді. Шындығында олардың көпшілігінің атында үй емес, ауыл шаруашылығын жүргізуге арналған тұрақ, қойма, жер учаскесі немесе жалпы жекешелендірілген тұрғын үйдегі үлесі болған.
Бағдарламаның жаңа шарты бойынша енді оларға қайта өтініш беруге болады.
"Бізге шалғайдағы ауылдағы шағын үйде басқа да көптеген отбасы мүшелерімен бірге тұрғын үй үлесі бар клиенттеріміз жүгінді. Гараж бен кішкентай қоймасы атына тіркелген адамдар да бар екен. Әрине, бұл фактілер оларға баспана қажет емес дегенді білдірмейді. Біз азаматтардың барлық өтініштерін мұқият қарап, "Отау" бағдарламасы бойынша бас тартылған азаматтардың деректеріне талдау жасадық. Қалыптасқан жағдай бойынша жеке шешім әзірледік. Енді азаматтар жылжымайтын мүліктің болуы бойынша деректерді объективті тексеру үшін оны қолмен жүктейтін болады. Сондықтан біздің салымшылар меншігінде тұрғын емес жылжымайтын мүлік болса да "Отау"бағдарламасына қайта өтініш білдіре алады. Өтініш 22-30 сәуір аралығында “Баспана маркет” порталында қабылданады", – деп түсіндірді" Отбасы банкі" басқармасының төрағасы Ләззат Ибрагимова.
Банк "Отау" бағдарламасы бойынша өтінімдердің жұмыс күндері сағат 9.00-ден 21.00-ге дейін қабылданатынын жеткізді.
Өтінімдерді қабылдау аяқталғаннан кейін банк тізімді саралайды. Шешім банк порталында жарияланады. Содан кейін бағдарламаға қатысушының несиелік өтінім беру үшін шамамен 40 жұмыс күні болады. Егер ол несие бойынша оң мақұлдау алса, онда ол өзіне баспана табуға тағы 6 ай уақыт алады.
Тұрғын үйді Алматыда, Астанада, Шымкентте және облыс орталықтарында ҚМК кепілдігімен үлестік қатысу шарты бойынша не сақтандыру құралын пайдалана отырып, сатып алуға болады. Бағдарламаға қатысушы аяқталмаған тұрғын үйді “Баспана маркеттен” таңдай алады.
"Отау" бағдарламасының несиелік шарттары:
20 пайыздан бастап – бастапқы жарна;
9 пайыз (ЖЭС 9,2 пайыздан 11,8 пайызға дейін) несие бойынша мөлшерлеме;
несие мерзімі – 19 жылға дейін.