Су тасқынынан зардап шеккен облыс­тардағы медициналық ұйымдар штаттық режимде жұмыс істеп тұр. Бұл туралы Ор­талық коммуникациялар қызметінде өткен брифингте Денсаулық сақтау министрлігінің ресми өкілі Әйгерім Оразалиева мәлімдеді.
Су басқан елді мекендерде 405 сәби дүниеге келді
629
оқылды

«Табиғи апаттың барлық кезеңінде су басқан елді мекендерден 422 жүкті әйел эвакуацияланды, 405 әйел аман-есен босанды, барлық сәби мен аналар патронаждық қызметтердің қамқорлы­ғында», – деді ол.

Бүгінде эвакуациялық пункттерде медици­налық және медициналық-психологиялық көмек көрсетуге 742 медицина қызметкері тартылған. Оның ішінде 143 дәрігер, сондай-ақ 69 психолог бар.

«Су тасқыны басталғаннан бері су басқан аймақтардан созылмалы аурулары бар 1360-қа жуық адам эвакуацияланды. Олардың әрқайсысы медицина қызметкерлерінің бақылауында, дәрі-дәрмектермен қажетті көлемде қамтамасыз етілу­де. Тасқыннан зардап шеккен 2 мыңнан астам адамға психологиялық көмек көрсетілді», – деп атап өтті Ә.Оразалиева.

Ведомствоның дерегінше, су тасқыны бас­талғалы эвакуациялық пункттерде барлығы 106 медициналық пункт ашылған. Қазіргі сәтте Ақтөбе, Батыс Қазақстан, Қостанай, Солтүстік Қазақстан, Маңғыстау, Атырау облыстарының эвакуацияланған тұрғындары үшін 59 медици­налық пост жұмыс істеп тұр.