Депутаттардың талқылауына екінші оқылымда «Мемлекеттік сатып алу туралы» және «Жол жүрісі туралы» Қазақстан Республикасының Заңына жекелеген көлік құралдары түрлерінің жүруін ұйымдастыру және жол қауіпсіздігін цифрландыру мәселелері бойынша өзгерістер мен толықтырулар енгізу туралы» заң жобалары ұсынылады. Әр заң жобасы бойынша Әкімшілік құқық бұзушылық туралы кодекске тиісті өзгерістер мен толықтырулар енгізіледі.
Мемлекеттік сатып алу туралы жаңа заң Президенттің мемлекеттік сатып алу саласын жетілдіру жөніндегі тапсырмаларын іске асыруға бағытталған.
Атап айтқанда, Мемлекет басшысының 2024 жылғы 7 ақпандағы Үкіметтің кеңейтілген отырысында берген тапсырмаларына жауап ретінде заң жобасында EPC-келісімшарттарды енгізу, офтейк-келісімшарттар арқылы отандық өндірушілерді қолдау, шағымдану рәсімдерін жетілдіру, жеткізушілердің жауапкершілігін күшейту және басқа да шаралар көзделеді.
Жол жүрісі туралы заңға енгізілетін жекелеген көлік құралдары түрлерінің жүруін ұйымдастыру және жол қауіпсіздігін цифрландыру мәселелері бойынша түзетулерге Парламент депутаттары бастамашылық етті. Заң жобасында көлік құралдарының (мопедтердің) жекелеген түрлерін бақылауды жүзеге асыру, мопедтерді мемлекеттік тіркеу (қозғалтқыштың көлемі 50 текше см-ден төмен), оларды тіркеу рәсімін оңайлату, мопедтерді басқару үшін жүргізуші куәлігін алу, мопед жүргізушілерінде «В» санатындағы жүргізуші куәлігі болған жағдайда «А1» санатын автоматты түрде беру көзделеді. Заңбұзушылықтар үшін жауапкершілікке қатысты бірқатар норма ҚР Әкімшілік құқық бұзушылық туралы кодекске тиісті түзетулер аясында енгізіледі.
Сонымен қатар Мәжіліс комитеттері зияткерлік меншік, тауарлардың шығарылған елін айқындау, ақпарат, қоғамдық даму, мәдениет және архив ісі салаларындағы нормалардың артық (шамадан тыс) заңнамалық регламенттелуін болғызбау мәселелері бойынша жаңа заң жобаларын жұмысқа алады. Сондай-ақ Қазақстан мен Қытай арасындағы Транскаспий халықаралық көлік бағытын, оның ішінде Қытай-Еуропа қатынасындағы контейнерлік пойыздар үшін дамыту жөніндегі келісімді ратификациялау жобалары, Қазақстан мен Өзбекстан арасындағы «Орталық Азия» халықаралық өнеркәсіптік кооперация орталығының қызметін реттеу туралы келісімді ратификациялау туралы заң жобасы да жұмысқа алынады.