Облыс әкімдігі мен Қарағанды қаласы әкімдігінің қолдауымен екінші мәрте өткізіліп отырған фестиваль биыл екі күнге созылды. Шараның ашылу салтанатында облыс әкімінің орынбасары Ермек Алпысов Мемлекеттік кеңесші Ерлан Қариннің құттықтауын жеткізді.
Екі күн бойы фестиваль қатысушылары кеншілер астанасының мәдени өмірімен танысты, шығармашылық индустриядағы жазушылардың рөлі және зияткерлік еңбекті қалай тиімді сату сияқты маңызды тақырыптарды талқылады. Сондай-ақ фестиваль аясында қатысушылар Қарағанды тау-кен индустриалды колледжінің мұражай-шахтасына түсті.
– Фестиваль алғаш рет былтыр ұйымдастырылды. Содан кейін оған Әзербайжан, Түркиядан танымал ақындар қатысты. Бұл – ақындар мен жазушылар, талантты жастар үшін тамаша алаң, онда біз заманауи поэзия мен әдебиеттің жаңа бағыттарын талқылай аламыз, жас авторлардың әлеуметтік мәселелерін көтере аламыз. Іс-шараны жастар шығармашылығын қолдау және оған жаңа серпін беру деп санаймыз, – дейді Жазушылар одағы облыстық филиалының төрағасы Жанат Жанқашұлы.
Фестивальда Ұлықбек Есдәулет, Серік Ақсұңқарұлы, Сұраған Рахмет, Қасымхан Бегман, Светқали Нұржан, Гүлнәр Салықбай, Маралтай Райымбек, Оңайгүл Тұржан, Жанат Әсербек және басқа да елге танымал ақындар бас қосты.
– Қарағандының ақындарына алғысым шексіз. Екінші жыл қатарынан қаламгерлердің басын қосып отыр. Осындағы филиалдың директоры, ақын Жанат Жаңқашұлының еңбегін ерекше атап өткім келеді. Фестивальда бүгінгі қазақ поэзиясының біршама мәселесі көтеріледі. Мұндай шара ақындарға ауадай қажет. Одақ төрағасы Мереке Құлкеновтың ыстық сәлемін қабыл алыңыздар, – деді Жазушылар одағы төрағасының орынбасары Қасымхан Бегманов.
Әдебиет БЕЛГІБАЙҰЛЫ,
Қарағанды облысы