Университеттің стратегиялық даму жөніндегі проректоры Думан Айтмағамбетов әріптестерін, студенттерді құттықтай келе оқу орнының алдағы мақсат-міндетіне аз-кем тоқталды.
«Тағы бір жылды артта қалдырдық. Бұл күні біз өткеннен қорытынды шығарып, жаңа мақсат-мұратқа талпынамыз. Биыл біз үшін жемісті жыл болды. Ауқымды жобаларды іске асырдық. Елдегі университеттердің тарихында алғаш рет инвестициялық форум өткіздік. Оған 30-дан астам жетекші бизнесмендер қатысты. Форум қорытындысы бойынша ірі компаниялармен 20 миллиард теңгеге келісімшартқа отырдық. Алдағы жылы жатақхана мәселесі шешіледі. 2 600 орындық жатақхана кешені, дәрігерлік амбулатория салынады. Біз жаңа «EҰУград» қалашығын саламыз. Осы берекелі бастаманың барлығы ұжымның жетістігі деп білеміз», – деді ол.
Осы күні қонақтар университетке қарасты ұлттық-мәдени орталықтардың жәрмеңкесін тамашалады. Конфуций институты (ҚХР), венгр тілі орталығы, Kultigin Club (Түркия), «Энрико Маттей» итальян мәдениеті орталығы, «Руй де Клавихо» атындағы испан тілі орталығы, Қазақстан-Беларусь ғылыми ынтымақтастық орталығы, қырғыз тілі мен мәдениеті орталығы және басқа да орталықтар салт-дәстүрін, ұлттық тағамдарын таныстырды. Универсиетте білім алатын шетелдік студенттер де дәстүрге айналған іс-шарадан қалыс қалмады. Мысалы, Йеменнен келген Ақпараттық технологиялар факультетінің 2-курс студенті Башар Аль Сабал еліміздің жетекші университеттерінің бірінде білім алып жатқанына дән риза.
– Өзім Ақпараттық технологиялар факультетінде оқимын. Осы сәтті пайдаланып, университет оқытушыларының кәсіби біліктілігі жоғары екенін атап өткім келеді. Білім сапасы жоғары болған соң студенттерге қойылатын талап та жоғары. Біз сол талаптың үдесінен шығып, келешекте білікті маман атануға тырысамыз, – дейді ол.
Мереке қарсаңында университет ұжымы, қонақтар зергерлік, тоқыма бұйымдары, ұлттық киімдер тізілген қолөнер көрмесін тамашалады. Ізінше қазақ күресінен өткен «ENU BARYSY – 2024» турниріне, садақ ату, арқан тартыс, асық ату сынды ұлттық ойындарға қатысып, қызықтады.
Университет ұжымының осы жылдар ішінде жеткен жетістігі көп. Мереке қарсаңында үздік оқытушылар, озат студенттер министрліктің, университеттің наградаларымен марапатталды. Осы тұста университеттің «Қонақжайлылық және демалысты басқару» атты білім беру бағдарламасы алғаш рет әлемнің үздік 50 университетінің қатарына енгенін атап өткен жөн. Өйткені университет бұл бағыт бойынша ең үздік елулікке енген Орталық Азиядағы жалғыз жоғары оқу орны саналады.
Ербол ЕРДЕНБЕК