Аудандық әкімшілкке облыс орталығынан телефакспен шұғыл хат келді.
Облыстан  келген  хат
287
оқылды

Хатта бадырайтып «өсіреміз» деп жазылған екен. Факстың бояуы бітіп қалса керек, қалған жері көрінбей қалыпты. Облыста отырғандарға «хатты қайта жіберіңдер» деп айтуға ешкімнің батылы бармады. Батырлар жоқ қой қазір. Тек ылғи өңшең орындаушылар ғана... «Өсіреміз» деген хатты хатшы қыз аудан әкімі Талтаңбайдың алдына лақтырып тастады. Шұғыл хатқа байланысты шұғыл отырыс шақырылды. Жиылғандар «өсіреміз» деген сөзді әр нәрсеге жорыды. Аудан әкімі өзін облысқа өсіретін шығар деп  терең ойға кетті. Ұялы телефонын алып қатыны Бөксегүлге телефон соқты.

– Әй, Бөксегүл бұл мен ғой, облыстан «өсіреміз» деген хат келіпті. 

– Ойбай, кімді, қайда өсіреді екен? – деді әйелі аптығып.

– Жай сөйле, мен жиналыста отырмын. Соны өзім де білмей отырмын, сенің  көріпкел подружкаларың бар еді ғой, солардан сұрашы, бұл хат кімді өсіреді екен?

– Жарайды...

Әкім хатты құшақтап жүрегіне басты. Пұшық мұрнымен қайта-қайта иіскеді. Тіпті, шетін тістеп шайнап та көрді. Менен басқа біреу өсіп кете ме деген ой жылтыр шекесін шымырлатты. Ал әкімнің орынбасары Қоңқыш аудан әкімінің тағына мен өсетін болармын деді ішінен. Өткенде облыстағы көкесіне бұйымтайын айтып, орамалын беріп келген еді. Қоңқыш өзіне сенімді. «Ертең әкім болсам көретінді көресіңдер, табанымның ас­тында құрдай жор­ғалатамын сен­дерді» деп шал­барының қалтасынан қо­лы­мен жұдыры­ғын түйіп қояды. Өсіп кетсем, бәріңді өлтіремін дейді ішінен. Жұмбақ хатты жақ­сы­ға жо­рығандар да болды.

– Мүмкін, жолдас­тар, бұл мал басын, жан ба­сын өсіреміз деген хат шығар, – деді ауданның шаруашылық бөлімінің бастығы Көсеубай. Аудан әкімі төбесінен найзағай ұрғандай селк ете қалды. Көсеубайдың көсіліп сөйлегені ұнамады. Ашуланғаннан аузындағы протез тісі тырс етіп жерге түсіп кетті. Әкім туфлиінің ұшымен жердегі жатқан жасанды тістерін білдірмей алғысы келіп еді, аяғы қапталында отырған бас есепші Шапанайдың сирағына тиді. Көптің көзінше бастығының мұндай әрекетін көрмеген Шапанай шошып кетті. Керіліп созып отырған екі аяғын өзіне қарай тартып қалғанда әкімнің протезі зырылдап домалап есіктің аузына барды да, аңқайып арандай ашылып тұрып қалды. Жиналыста отырғандар аузын басты. Кімнің тісі екенін ешкім аңғармады. Әкім байғұс аузын аша алмай сақау болды да қалды. Болмаса Көсеубайға ескерту жасағысы келіп еді. 

– Мәдениет қызметкерлерінің айлығын өсіретін шығар, – деді аудандық мәдениет бөлімінің меңгерушісі Қатынбек. «Ақшада басың қалсын, тілің кесілсін» деп әкім ішінен міңгірлеп көзімен тіліп өтті. 

– Ауданға көкөніс, көшелерге тал өсіреміз деген шығар. Көп жыл болды, ауданда ағаш отырғызылған жоқ, – деді бас маман. 

Не керек, әркім «өсіру» туралы әртүрлі ойлап жатқанда хатшы қыз кірді.

– Облыстан факс қайта келді, «жарық пен жылудың бағасын өсіреміз» деген екен дей беріп еді, әкім орындыққа сылқ ете қалды. Бас есепші ішегін тартты, әкім орынбасарының беті жыбырлады. 

Нұрлыбек ЖҰБАТҚАН