Британиялық кәсіпкер Майкл Линч мінген желкенді кеме Сицилия жағалауында апатқа ұшырады. Бұл туралы ТАСС ақпарат агенттігі жазды, – деп хабарлайды Aikyn.kz ҚазАқпаратқа сілтеме жасап.
Жайсыз хабар жөнінде Reuters агенттігі іздеу-құтқару операциясына жақын дереккөзге сілтеме жасап хабарлады.
Технология саласына қосқан үлесі үшін өз елінде «британиялық Билл Гейтс» атанған Линч қайғылы оқиға кезінде жоғалып кетті. Бортта болған оның әйелі Энджела Бакарес құтқарылды.
Линч – 2011 жылы Hewlett-Packard (HP) 11 млрд долларға сатып алған Autonomy компаниясының негізін қалаушылардың бірі. Бұл мәміле Линчке 800 млн доллардан астам табыс әкелді. Алайда АҚШ билігі оны 13 бөлім бойынша алаяқтық жасаған, соның ішінде Автономияның қаржылық көрсеткіштерін әдейі арттырды деп айыптады. Мәміледен кейін HP сатып алынған актив құнының маңызды бөлігін есептен шығаруға мәжбүр болды, ал Линч 20 жылға дейін түрмеде отыруы мүмкін еді. Алайда ол 2024 жылдың маусымында ақталды.
ANSA агенттігінің хабарлауынша, 22 адам мінген ұзындығы 56 метрлік Bayesian желкенді кемесі дүйсенбі күні таңертең Палермо қаласының маңында суға батып кеткен. Яхта Британ туы астында жүзген, жолаушылар негізінен Ұлыбританиядан келген. Сонымен қатар онда Жаңа Зеландия, Шри-Ланка, Ирландия және Ұлыбритания мен Францияның қос азаматтығын алған адамдар болған.
Жағалау күзеті Палермо балалар ауруханасына жеткізілген 15 жолаушыны, оның ішінде 1 жасар баланы құтқарды. Сүңгуірлер кеме батқан жерден жолаушылардың бірінің денесін тапты. Алтауы, оның ішінде төрт британиялық із-түзсіз жоғалған.
Суға батқан кеме жағалаудан 800 метр қашықтықта, 49 метр тереңдікте орналасқан. Хабарланғандай, бұған дейін кеме жоғалған аймақта қатты дауыл болған.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.