Бұрынғы қала әкімінің ұлы қарт анасына қол көтергені үшін үш жылға бас бостандығынан айырылды.
Экс-әкімнің ұлы қарт анасын ұрғаны үшін үш жылға сотталды
Фото: istockphoto.com
307
оқылды

Қарағанды қаласының Қазыбек би аудандық сотында 78 жастағы кейуананы ұрып-соққан ұлына қатысты іс қаралды, – деп хабарлайды Aikyn.kz.

Бұрынғы қала әкімінің ұлы қарт анасына қол көтергені үшін үш жылға бас бостандығынан айырылды.

Сотқа дейінгі тергеп-тексеру органдары айыпталушы 1946 жылы туған анасына қасақана дене жарақатын салғаны, денсаулығына орташа ауырлықтағы зиян келтіргені және дәрменсіз күйде болған қарияға қатысты қылмыс жасағаны үшін Қылмыстық кодекстің 107-бабы 2-бөлігі 3-тармағы бойынша айып тақты. 

Белгілі болғандай, ер адам үйінде отырып, анасымен жанжалдасып, ашуға булыққан күйі кейуананың басы мен денесін жұдырықтап, аяғымен тепкілеген. Салдарынан қария жабық бас-ми жарақатын алған: мидың шайқалуының өткір кезеңі, оң көз орбитасының бүйір қабырғасының сынуы, оң жақ бет сүйек доғасының сынуы, оң жақ гаймор қуысының алдыңғы және артқы қабырғаларының сынуы, гемосинус дамуы, беттің көгеруі; оң жақтағы кеуде қуысының жабық жарақаты, 3, 4, 5, 6 қабырғаларының сынуы; бірінші бел омыртқасының жабық, асқынбаған компрессиялық сынуы тіркелген.

Қатыгездің кінәсі жәбірленушінің, куәгер болған көршілердің айғақтарымен, сараптамалардың қорытындыларымен және істің басқа да материалдарымен дәлелденді.

Прокурор айыпталушыға 3 жылға бас бостандығынан айыру жазасын тағайындауды және талап-арыздарды толық қанағаттандыруды сұрады.

Ал қорғаушы тарап бас бостандығынан айырмайтын жеңілдеу жаза тағайындауды сұраған болатын.

Алайда сот оның жеке басын, кінәні жеңілдететін және ауырлататын жағдайлардың жоқтығын, сондай-ақ кінәсін мойындамағанын және жасаған ісіне өкінбегенін, жақын адамына – өз анасына дене жарақатын салғанын ескере отырып, бұл бап бойынша қатал жаза кесуді шешті.

«У.-ға 2024 жылғы 23 қыркүйектегі сот үкімімен орташа қауіпсіздік қылмыстық-атқару жүйесі мекемесінде 3 жыл мерзімге бас бостандығынан айыру жазасы тағайындалды.

Талап-арыздар толық қанағаттандырылып, 1 000 000 теңге көлемінде моральдық зиянды өтеу сомасы, сондай-ақ адвокаттарға төленген шығындар өндірілді», – деп мәлімдеді Қарағанды қаласы Қазыбек би аудандық сотының баспасөз қызметі.

Сараптама, зерттеу мақала, күнделікті өзекті ақпаратты «Айқынның»  Telegram  арнасынан таба аласыз.