Роза Бағланова атындағы «Қазақконцерт» мемлекеттік академиялық концерттік ұйымының «Халық қазынасы» ұлттық өнер орталығы көрермен назарына Қоянды, Көкжар, Қараөткел сынды тағылымы мол тарихи жәрмеңкелерді жаңғыртқан жаңа форматтағы «Біздің жәрмеңке» думанды кешін ұсынбақ, – деп хабарлайды Aikyn.kz.
Шоу-концертте Қазақстанның еңбек сіңірген қайраткерлері Жанғали Жүзбай, Құмарбек Қалқатай, Медет Салықов, Ардақ Балажанова, Елмұра Жаңаберген, Айгүл Елшібаева, Раушан Оразбаева, Айзат Қарабекова, Нұрболат Арзамасұлы, Мәдениет қайраткерлері Толғанбай Сембаев, Ерболат Шалдыбеков, Мәдениет саласының үздігі Перизат Тұрарова, «Дарын» жастар сыйлығының лауреаттары Асқар Мұқият, Күнсұлу Түрікпен, халықаралық байқаулардың лауреаттары Ақерке Тәжібаева, Дінисламбек Жайлаубай, Біржан Айтахметов, Алихан Дүйсенбай, Венера Табыс, Дария Бекпенбетова, Аяулым Қамажан өнер көрсетеді. Бұған қоса, «Астана сазы» мемлекеттік фольклорлық ансамблі мен «Бірлік» ән-би ансамблі өнерлерін ортаға салмақ.
Орталықтың өнер майталмандары көрермен назарына ұлтымыздың әуелеген әсем әндерін, күмбірлеген күй мен жыр жауһарларын, төл өнерімізден үздік үлгілерін паш етпек.