Қарағанды облысы Теміртау қаласында адам шошырлық факт анықталды: қашан көз жұмғаны белгісіз үш адамның мәйітін үйдегі иттер талап жеген, – деп хабарлайды Aikyn.kz.
Қарағанды облысының Полиция департаменті хабарлағандай, үш адамның өлімінен зорлық-зомбылықтың белгісі табылмаған.
«Кешкі Қарағанды» газетінің жазуынша, Теміртау қаласы Уәлиханов көшесінің бойындағы үйде орналасқан пәтерден қыңсылаған иттердің дауысы шыққан. Оның үстіне, уақыт өте келе пәтерден сасық иіс тараған. Көршілердің шақыртуы бойынша оқиға орнына жеткен құтқарушылар сұмдық көрініске тап болған.
«Құтқарушылар есікті бұзып кіргенде алдарынан питбул иттер үріп шыққан. Кинологтар иттерді ұстап алған соң, полиция ішке кіріп, үш адамның мәйітін тапқан», – деп жазады дереккөз.
Ал, Қарағанды облысының Полиция департаменті үш адамның өліміне қатысты қылмыстық іс қозғаған.
«Мәйіттерден зорлық-зомбылықтың белгілері табылған жоқ. Олардың өліміне қатысты қылмыстық іс қозғалды. Қазір өлімнің нақты себебін анықтау үшін тергеу жүріп жатыр», – деп хабарлады облыстық ПД.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.