Жогорку Кенеш депутаттарымен кездесу барысында басты тақырып – парламентаралық ынтымақтастықты нығайту болды. Мәжіліс Төрағасы екі мемлекет басшылары арасындағы келісімдерді заңнамалық тұрғыда қамтамасыз ету Қазақстан мен Қырғызстан парламентшілерінің басты міндеті екенін атап өтті.
– Ағайынды Қырғызстан әрдайым еліміздің сенімді стратегиялық серіктесі және солай болып қала бермек. Соңғы жылдары жоғары деңгейдегі кездесулердің қарқыны да, мазмұны да ынтымақтастығымыздың одақтастық сипатын айшықтайды. Президент Садыр Жапаровтың биылғы Қазақстанға жасаған ресми сапарының тарихи маңызы зор болды. Одақтастық қатынастарды тереңдету мен кеңейту туралы мемлекетаралық шарт және бірқатар маңызды салалық келісімге қол қойылды, – деді Ерлан Қошанов.
Мәжіліс Спикері қырғыз әріптестеріне Қазақстанда Қасым-Жомарт Тоқаевтың бастамасымен жүргізіліп жатқан саяси өзгерістер туралы айтып берді. Ол сондай-ақ көппартиялы Мәжілістің VIII шақырылымдағы заңнамалық қызметі туралы хабардар етті. Әсіресе, Қазақстан қоғамы үшін маңызы зор «Ұлттық қор – балаларға», әйелдер мен балалардың құқықтарын қорғау, құмар ойынға тәуелділік пен есірткі өндірісіне қарсы күрес туралы заңдарға кеңінен тоқталды.
Мәжіліс Төрағасы екі ел депутаттары арасында ең өзекті мәселелерді жедел шешуге мүмкіндік беретін тұрақты және сындарлы диалог орнағанын атап өтті.
Ерлан Қошанов ТМД Парламентаралық Ассамблеясы, ЕҚЫҰ Парламенттік Ассамблеясы, Ұжымдық қауіпсіздік шарты ұйымының Парламенттік Ассамблеясы, Түркі мемлекеттері ұйымының Парламенттік Ассамблеясы, сондай-ақ «Орталық Азия – Корея Республикасы» парламенттері спикерлерінің кездесу форматтары аясында ынтымақтастықты одан әрі нығайтуға ниетті екенін мәлімдеді. Ол Қазақстан мен Қырғызстан арасындағы парламентаралық ынтымақтастықтың ерекшелігі ретінде халықаралық бастамаларды өзара қолдаудың тұрақтылығына назар аударды.
Кездесу соңында Мәжіліс Спикері Жогорку Кенеш төрағасы Нурланбек Шакиевке Қазақстан Республикасы мен Қырғыз Республикасы арасындағы екіжақты қарым-қатынасты нығайтуға және дамытуға қосқан елеулі үлесі үшін «Достық» орденін табыстады. Жогорку Кенеш төрағасының орынбасары Нұрбек Сыдыгалиевке Құрмет грамотасы берілді.
Парламентаралық ынтымақтастық кеңесінің екінші отырысында депутаттар экономика, инвестиция, су энергетикасы, көлік, білім беру және мәдени-гуманитарлық салалардағы ынтымақтастықты талқылады.
– Екіжақты ынтымақтастықтың маңызды бағыты – су қауіпсіздігі. Бұл саладағы тиімді әріптестік су ресурстарын ұтымды әрі әділетті пайдалануға, тараптардың мүдделерін ескеруге және өзара міндеттемелерді орындауға негізделеді. Биыл бірлесе атқарған шаралардың арқасында суару маусымы еш шығынсыз өтті, – деді Ерлан Қошанов.
Депутаттар энергетика саласындағы байланысты дамыту мәселесін де талқылады. Мәжіліс Спикері биыл жазда Қазақстан, Қырғызстан және Өзбекстан арасында Камбар-Ата гидроэлектр стансасын салу туралы үшжақты келісімге қол қойылуы маңызды оқиға болғанын атап өтті.
Мәдени-гуманитарлық саладағы қарым-қатынас туралы айта келе, Парламент төрағалары мемлекет басшыларының тапсырмасымен мәдениет, бұқаралық ақпарат құралдары, туризм салаларында бірлескен жобалар сәтті жүзеге асырылып жатқанына тоқталды. Жастар мен студенттер белсенді түрде тәжірибе алмасып жатыр. Бүгінде Қырғызстанда Қазақстанның екі жоғары оқу орнының филиалы жұмыс істейді.
Парламентаралық кеңестің екінші отырысы соңында Қырғыз Республикасы Жогорку Кенеші мен Қазақстан Республикасы Парламенті арасындағы ынтымақтастық бойынша Парламентаралық кеңес туралы ережеге қол қойылды.
Сонымен қатар сапар барысында Мәжіліс Төрағасы мен депутаттар 1916 жылғы қайғылы оқиға кезінде қаза тапқандарға арналған ескерткішке гүл шоқтарын қойып, ұлы қырғыз жазушысы Шыңғыс Айтматовтың зираты мен мұражай-үйіне барды.
Ресми сапардың екінші күніне Ерлан Қошановтың Қырғыз Республикасы Президенті Садыр Жапаровпен кездесті.
Мәжіліс Спикері Қырғызстан басшысына Қазақстан Президенті Қасым-Жомарт Тоқаевтың жылы лебізі мен ізгі тілегін жеткізді. Сондай-ақ Садыр Жапаровтың бауырлас халықтар арасындағы достық пен одақтастық қатынастарды нығайтуға қосқан зор үлесін атап өтті.
Ерлан Қошанов қазіргі таңда Орталық Азия тұтас өңір ретінде жаңа даму кезеңін бастан кешіп жатқанына, бұл кезеңді Қазақстан Президенті «Орталық Азия Ренессансы» деп атағанына назар аударды. Мәжіліс Төрағасы мемлекет басшылары қабылдаған «Орталық Азия–2040» өңірлік ынтымақтастықты дамыту тұжырымдамасын жүзеге асыруда парламенттердің белсенді рөл атқаруға ниетті екенін жеткізді.
Қырғызстан Президентіне Жогорку Кенеш төрағасы Нұрланбек Шакиевпен кездесудің және Қырғыз Республикасының Жогорку Кенеші мен Қазақстан Республикасы Парламенті арасындағы ынтымақтастық жөніндегі Парламентаралық кеңестің екінші отырысының нәтижелері туралы ақпарат берілді. Мәжіліс Спикері екіжақты қатынасты нығайтудағы Кеңес жұмысының маңыздылығына ерекше тоқталды.
– Парламентаралық кеңес Қазақстан мен Қырғызстан арасындағы саяси диалог пен өзара түсіністікті одан әрі тереңдетуге ықпал ететін болады. Оның тиімділігін көріп отырмыз. Кеше қырғыз әріптестерімізбен сауда-экономика, инвестиция және мәдени-гуманитарлық ынтымақтастықтың келешегін талқыладық. Шекаралық бақылау, су және энергетика қауіпсіздігі салаларындағы ықпалдастыққа де ерекше көңіл бөлдік. Сонымен қатар біздің Кеңес заң шығару қызметінде тәжірибе алмасуға, туындаған мәселелер бойынша шұғыл шешімдер қабылдауға және парламенттеріміздің депутаттары арасындағы байланысты нығайтуға зор мүмкіндік береді, – деді Ерлан Қошанов.
Мәжіліс Спикері сондай-ақ Қырғыз Республикасына алдағы Түркі мемлекеттері ұйымына төрағалығына табыс тілеп, екі ел депутаттарының ТҮРКПА, ҰҚШҰ ПА, ТМД ПА секілді халықаралық алаңдарда және аймақ үшін жаңа форматтағы «Орталық Азия – Корея Республикасы» Парламент спикерлерінің кеңесінде келісілген жұмысын атап өтті.
Қырғыз Республикасының басшысы Қазақстан Президенті Қасым-Жомарт Тоқаевқа сәлемін жолдап, оның жетекшілігімен Қазақстанда жүргізіліп жатқан саяси және экономикалық реформаларды жоғары бағалады.