Бұл үйлер 5 жыл бұрын пайдалануға берілген. Пәтерлерді көпбалалы, толық емес отбасы және мемлекеттік қызметшілер санаттары бойынша кезекте тұрғандар алған. Бүгінде 24 қабатты үйдің 1500 пәтерінде 8 мыңнан астам адам тұрады.
Тұрғындарды үйлердің техникалық жағдайы, инженерлік коммуникациялардың жай-күйі. Олардың ішінде жылу тораптарындағы сорғылар, электр қалқан жабдықтары және паркингті электрмен жабдықтау, шатыр, желдету және өртке қарсы дабыл, нөсер кәрізі (паркингті су басу), кіреберістерді жөндеу сияқты бірқатар мәселе алаңдатады. Олардың айтуынша, бұған дейін бірнеше рет мемлекеттік органдарға жүгінген. Тұрғын үйлерде инженерлік коммуникациялық жүйелер болғанымен, жұрт игілігін көре алмай отырғанын жеткізді. Көпбалалы ана Гүлдария Талғатқызы мұндай көшпелі жиынның бұған дейін де біразы болып, айтылған мәселе ескерусіз қалғанына көңілі толмағанын айтты.
– Мен 7 баланың анасымын. Бұл халық көбірек қоныстанған аймақтың бірі болғандықтан, кейде үй-күйсіз жүргендер кіріп кетеді. Яғни, қауіпсіздік шаралары дұрыс реттелмеген. Менен басқа қаншама көпбалалы ана бар. Ойын баласы болса көп. Ал сырттан кіріп келген бейтаныс адамның әр қабатта түнеп шығуы, рұқсатсыз кей пәтерлердің есігін қағуы бәріміз үшін қауіпті деп ойлаймын. Осы үйде тұрып жатқаныма 5 жыл болды. Мұнда жиын талай рет болды. Бірақ айтылған мәселе шешілмейді, әр кездесуде қайта-қайта айтамыз. Екіншіден, жас отбасы да көп. Әрі көпбалалы отбасының әлеуметтік жағдайының тым жақсы емесінен коммуналдық төлемдер кешігіп қалатыны бар. Салдарынан, коммуналдық жағдайлар нашарлайды. Одан бөлек, бұл үйде жөндеу жұмыстары болмағаны былай тұрсын, өртке қарсы дабыл жоқ, желдету, нөсер кәрізі сияқты жүйелер істен шыққан. Пәтер беретін кезде кілтті қолымызға ұстатты да кетті. Жүйелердің сақтандыру құжаты да болмады, – деді тұрғын.
Қалалық мәслихат депутаты, «AMANAT» партиясы фракциясының мүшесі Қанат Естек тұрғындарды алаңдатқан мәселе жақын арада шешімін табатынын түсіндірді.
– Бүгінгі айтылған мәселелерді тұрғындардың жан айқайы деуге болады. Үйлердің берілгеніне 5 жылға жуық уақыт болса, содан бері ешқандай толыққанды жөндеу жұмыстары атқарылмаған деп жатыр. Олардың мәселесін шешу үшін әкімшіліктен, құзырлы органдардан жауапты мамандар шақырдық. Бұл жерде тоқтала кететін жайт, аталған үйде 1050 жас отбасы және 200 ден астам көпбалалы ана тұрады. Кезінде оларға пәтер берілген кезде жалға алу уақытының 5 жыл екені жазылған. Бірақ сол құжатта бұл уақыттан тағы создыруға болатын мүмкіндігі де айтылып еді. Бүгінде Сенатта да, Мәжілісте де тұрғын үйді жалға алу туралы заңнама қарастырылған. Яғни, осындай пәтерде тұрғандар оны сатып ала алытыны туралы келісімге қол қойылды. Қазір ол құжат Мемлекет басшысына жіберілді. 10 күн ішінде жауап болуы мүмкін. Егер Мемлекет басшысы қолдаса, көпбалалы отбасы өздері тұрып жатқан осы пәтерлерін сатып ала алады. Ал жас отбасылар туралы ақпарат жоқ. Демек, олар үйді босатуға тиіс. Айналып келгенде, тұрғын үйлердің ішкі және сыртқы жөндеу жұмыстарына көп қаржы бөлінуі керек. Тұрғындарың өзінен жинап, 15 жылға дейін бөліп төлеуге болады десек, олардың 70 пайызы – жас отбасы. Олар бүгін не ертең үйлерін босатады. Сондықтан жас отбасыға артық шығынның керегі жоқ, – деді Қ.Естек.
Депутаттың айтуынша, отырыста айтылған мәселелер бойынша алдағы уақытта прокуратура, әкімшілік, басқа да құзырлы органдарда кеңесіп жұмыс атқарылады.
С. БЕГІМБАЙ