Елордада қар тазалау жұмыстарына 1,2 мыңнан аса арнайы техника мен 2 400 маман жұмылдырылды. Қалада түні бойы жауын-шашын көп жауды. Қаланың коммуналдық қызметтері бірнеше ауысымда тәулік бойы күшейтілген режимде үздіксіз жұмыс жүргізіп жатыр, – деп хабарлады Астана әкімдігі.
9 қарашадан 10 қарашаға қараған түні қаладан 2 400 текше метр қар шығарылды, яғни мамандар 188 рейс қар шығарды.
Ең алдымен жолдарда кептеліс болмауы үшін өте қарқынды қозғалыс аймақтары тазартылады. Сондай-ақ орташа қарқындылығы бар учаскелер-алаңдар, вокзал маңы, тротуарлар, әлеуметтік нысандарға кіретін жолдар және т. б. орындар қардан тазартылады, – деп хабарлады әкімдік.
Қалада бірнеше жабдықталған қар полигоны бар. Ол жерге бейнебақылау камералары орнатылған, жарықтандыру қосылған.
Ауа райының қолайсыздығына байланысты Астана әкімдігі қала тұрғындары мен қонақтарынан жазатайым оқиғаларды болдырмау үшін көшеде жүргенде өте мұқият әрі сақ болуды сұрайды.