Бес күн ішінде «Жастар рухы» Жастар қанатының белсенділері мен еріктілері еліміз бойынша 3000-нан астам есірткіні жарнамалайтын граффитиді жойды, – деп хабарлайды Aikyn.kz.
Аймақтарда есірткіге қарсы белсенді күрес жалғасуда. «AMANAT» партиясы жанындағы «Жастар рухы» Жастар қанаты «Есірткіге жол жоқ!» акциясын өткізіп жатыр. Акцияға жергілікті әкімдіктер, полиция департаменттері, прокуратуралар, мәслихат депутаттары және қоғам белсенділері қолдау көрсетуде. Ұйымдастырушылардың айтуынша, бүкіл ел бойынша 400-ден астам жасөспірім шараға қатысты.
«Заңның үстемдігін қамтамасыз ету – Мемлекет басшысы Қасым-Жомарт Тоқаевтың сайлауалды бағдарламасының негізгі басымдықтарының бірі. Ал «Заң және Тәртіп» принципін Президент биыл наурыз айында Атырауда өткен Ұлттық құрылтай жиынында мәлімдеді. Елдегі құқықтық тәртіпті нығайтуға және жастардың денсаулығы мен болашағын қорғауға өз үлесін қосу мақсатында «Жастар рухы» белсенділері дәстүрге айналған «Есірткіге жол жоқ!» акциясын өткізуде», – деді «Жастар рухы» ұйымының төрағасы Ақерке Искандерова.
Орал қаласында «Жастар рухы» белсенділері тұрғын үйлердің, гараждар мен қоршаулардың қабырғаларындағы есірткі жарнамаларын өшірді. Аймақтық Полиция департаментінің мәліметі бойынша, жыл басынан бері 25 есірткі жарнамалаушы ұсталған, олардың 6-ы кәмелетке толмаған жасөспірім. Құқық қорғау органдары есірткі жарнамасын граффити арқылы таратқаны үшін 3 жылдан 6 жылға дейін бас бостандығынан айыру жазасы қарастырылғанын еске салады. Қазіргі уақытта өңірде 300 адамнан тұратын мониторингтік топ жұмыс істеп жатыр. Олар есірткі жарнамалары туралы ақпаратты полицияға жеткізіп отырады.
«Есірткіге қарсы күрес – тек құқық қорғау органдарының міндеті ғана емес, бүкіл қоғамның да жауапкершілігі. Біз тек жарнамаларды бояп қана қоймай, жастармен кездесулер өткізіп, диалог алаңдарын ұйымдастырып, есірткілердің зияны туралы айтып, азаматтардың пікірін өзгертуге тырысамыз. Тек барлығымыз бірігіп қана болашақ ұрпақ үшін қауіпсіз орта қалыптастыра аламыз», – дейді Батыс Қазақстан облыстық филиалының төрағасы Архат Исламғали.
Тараз қалалық прокуратурасының прокуроры Асылхан Әбітбеков волонтерлердің есірткі бизнесіне қарсы күрестегі белсенді рөлін атап өтті:
«Еріктілердің көмегі арқасында біз тек құқық бұзушылықтарды алдын алып қана қоймай, жастар арасында құқықтық сауаттылықты да арттырамыз. Әрбір еріктінің жұмысы – есірткіге қарсы күрестегі маңызды қадам. Еріктілердің белсенділігі мен ақпараттық жұмысы арқылы біз есірткімен байланысты қылмыстарды азайтып, құқық бұзушылықтарды уақытында анықтаймыз», – деп атап өтті ол.
«Жастар рухы» тек есірткі жарнамаларын бояп қана қоймайтынын атап өту маңызды. Мысалы, өткен жылы халықаралық жастар күніне орай Астанада «Bir Tolqynda» заманауи би чемпионаты ұйымдастырылды. Бұл шара жастарды салауатты өмір салтына ынталандыру, белсенді және пайдалы демалысқа баулу, сондай-ақ есірткіге тәуелділік мәселесі туралы хабардарлықты арттыру мақсатында өткізілді. Сонымен қатар, еліміздің барлық өңірлерінде мини-футбол, волейбол, садақ ату, үстел теннисі, жүзу сияқты түрлі жарыстар ұйымдастырылды. Оған жалпы 3000-нан астам жас қатысты.
Сонымен қатар, «BirTolqynda» және «Рухтастар Cases» диалог алаңдарында есірткі заттарының зияны туралы лекциялар өткізілуде, сараптамалық алаңдар ұйымдастырылып, жас пікір көшбасшылары, дәрігерлер, әлеуметтік қызметкерлер және депутаттармен кездесулері ұйымдастырылуда. Ашық пікірталас форматында жастар өздерін қызықтыратын кез келген сұрақтарын қоюға мүмкіндік алады. Осылайша, «Жастар рухы» Жастар қанаты елде есірткіге деген төзбеушілік мәдениетін қалыптастыруға және қоғамда «Заң және Тәртіп» принципін насихаттауға үлес қосуда.