«Табиғатпен ұштасу» деп аты айтып тұрғандай, табиғат аясында, таза ауада, аппақ мамыққа оранған далада шаңғымен жарыса өнер көрсету – адам жанын жадыратып, рақатқа бөлейтіні анық. Табиғат-Ана – күллі тіршілік атаулының қасиетті мекені, туған өлкесі. Сондықтан табиғатпен етене тіршілік кешу, оны қорғау және табиғат аясында қоршаған ортаның сан алуан игілігін сезіне білу саналы адам үшін қастерлі де. Табиғат аясында демала білу, оны қорғай алу мәдениет десек, адам денсаулығы мен ішкі жан дүниесінің тыныштығын Табиғат-Анамен ұштастыра білу өнер. Күнделікті өмірде қайталап айта беретін экологиялық мәдениет пен экосана туралы ұғым әдетте саламатты өмір салтына баулитын спорттық жарыстар мен спорттық түрлі іс-шара арқылы қалыптасады. Ал жекелеген адам және тұтас отбасын жұмылдыру арқылы қоғамды табиғатты аялауға, қоршаған орта тазалығын сақтауға және табиғатпен үндесе таза ауада ойын ойнап, демала білуге дағдыландырудың жөні бөлек. Ұйымдастырушылардың айтуынша, эстафетаның мақсаты – отбасылық байланысты нығайту және қатысушыларды табиғатпен белсенді өзара әрекеттесе білуге баулу, балалар мен ересектердің бойында қоршаған әлемге құрмет ұғымын қалыптастыру, табиғатқа жауапкершілікпен қарауды, қоршаған ортаны қорғауды үйрету және экосана мен экомәдениеттің қалыптасуына үлес қосу.
– Отбасылық эстафета Президентіміздің бастауымен «Таза Қазақстан» экологиялық акциясын қолдау мақсатында өткізілді. Отан – отбасынан басталады. Әрбір жас бала өзінің ата-анасына қарап үлгі алатындықтан, іс-шараның тәрбиелік мәні зор. Осы эстафетаның арқасында қатысушылар тазалық сақтаудың маңыздылығын түсінеді деп ойлаймын. Қыс мезгілінде осындай эстафеталарды өткізудің өзіндік ерекшелігі бар. Таза ауада қыстың суығына қарамастан, спорттық іс-шараға қатысудың өзі ерекше әсер сыйлайды. Сондықтан «Шаңғы роллер» тасжолын таңдадық. Бұл жер өте керемет. Біз мұнымен тоқтап қалмаймыз. Әлі де көптеген турнир мен жарыс өткізіп, Астанамыздың спорт мәдениетін көтеруге атсалысамыз, – деді Астана қаласы әкімдігінің «Спорттық-бұқаралық іс-шараларды өткізу дирекциясы» КММ спорттық-бұқаралық іс-шараларды жоспарлау бөлімінің басшысы Көлбай Жанбек.
Эстафетаға әр командада 3 адамнан (әкесі, анасы және баласы) құралған 15 отбасы қатысып, өзара бақ сынады. Жарыс барысында отбасылық әуесқой спортшылар төрт түрлі сайыста (эстафеталық жүгіру, доппен жүгіру, шайба таяғымен допты межеге жеткізу, допты қоқыс жәшігіне дәл түсіру) өнер көрсетті.
– Отбасымызбен бірге осындай эстафетаға бірінші рет қатыстым. Көңіл күйім тамаша. Спортпен күнделікті айналыссақ та, жарыстағы атмосфераның орны бөлек. Бәсекелестік жоғары деңгейде болды. Бос уақытымызды тиімді өткізіп, бала-шағамызбен жақсы эмоция алдық, – деді отбасылық эстафетаның қатысушысы Серікбай Әлімханов.
Спорттық іс-шараға бірінші рет қатысып отырған Әбілмансұр Қамаржанұлы да мұндай эстафетаға отбасымен қатысудың әсері бөлек екенін айтты.
– Саламатты өмір салтын қалыптастыратын мұндай спорттық жарыстардың көп болғанын құптаймын. Әсіресе, қыс мезгіліндегі спорттық ойындар ерекше қызықты болады. Біз де отбасымызбен мұндай жарысқа бірінші рет қатысып отырмыз. Бір команда болып, бір мақсатқа бірігіп, жеңіске ұмтылу – отбасылық бірлікті, өзара қарым-қатынасты нығайтуға, және көңілді демалуға басқаша әсер еткенін қуана-қуана айтқым келеді. Сондай-ақ біз жарыс барысында отбасымызбен экологиялық сауаттылық дегеннің не екенін ұғына түстік десем болады, – деді ол.
Спорттық эстафета отбасылар арасындағы сайыс қана емес, «Таза Қазақстан» экологиялық акциясын жүзеге асыруға да үлесін қосқан шара болды. Жарыс барысында әр командаға қоқысты қайта өңдеу бойынша шеберлік сыныптары ұйымдастырылып, онда қатысушылар қоқысты дұрыс жою тәсілдері мен қоршаған ортаны қорғаудың маңыздылығын үйренді.
Астана қаласы әкімдігінің №7 балалар мен жасөспірімдер спорт мектебінің бас жаттықтырушысы Ернар Омаров ойын барысында доптарды қоқыс шелекке жинаудың қандай артықшылықтары бар екеніне тоқталды. Оның айтуынша, бұл ойын шеберлік пен дәлдікті дамытатын ойын.
– Доптарды шелекке дәл тастау – бұл ойынның адам ойының қырағылығы мен қимылының ептілігін, шеберлігін дамытуға тигізер әсері көп. Сайыс барысындағы төрт түрлі ойынның өзіндік ерекшеліктері бар. Сондықтан әр команда өзінің жіті қимылдары арқылы тамаша өнер көрсетті деп есептеймін, – деді ол.
Жалпы, адам денсаулығы үшін қай мезгіл болмасын табиғат аясында демалудың және таза ауамен еркін тыныстаудың маңызы зор. Астана қаласы әкімдігі спорттық жарыстар ұйымдастыру арқылы саламатты өмір салтын қалыптастырудың тамаша үлгісіне айналды десек артық айтпаймыз. Әсіресе, қала тұрғындарының қыс мезгілінде табиғатта серуендеуіне барынша қолайлы орта қалыптастырды десек болады. Мәселен, Астана маңында Аршалы ауданындағы «Бейбарыс» демалыс базасы, Ақкөл ауданындағы Arka tour шаңғы базасын, Shar Zhum демалыс орны секілді демалыс аймақтарын айтпағанда, қала ішінде шаңғы теуіп, шанамен сырғанап, сергіп, серпіліп қайтуға тұрарлық саябақ көп. Қыс мезгілінде аппақ мамыққа оранып, ертегі қалаға айналатын Астанада тұрғындар мен қонақтар үшін және балалардың көңілді демалысы үшін мұз айдындары, сырғанақтар, сүйкімді шағын архитектуралық мүсіндер, фотоаймақтар дайындалады. Қала әкімдігінің хабарлауынша, елордалық 6 ауданда қыс бойы жұмыс істеуге арналған 60-қа жуық мұз айдыны мен қар сырғанақтары ашылады.
Сондай-ақ астананың биылғы денешынықтыру-спорттық және сауықтыру іс-шараларының күнтізбелік жоспарына сәйкес, барлығы 816 спорттық іс-шара ұйымдастыру керек болса, бүгінгі күнге дейін жоспарға сәйкес 648 іс-шара ұйымдастырылыпты. Астана қаласының Дене шынықтыру және спорт басқармасы басшысының орынбасары Исламбек Баймановтың айтуынша, жоспар аясында қысқы маусымдық дәстүрлі спорттық ойындар тізбесі де қамтылған. Олар шаңғы тебуден фестивалін, шорт-тректен Қазақстан Республикасының кубогын, конькимен мәнерлеп сырғанаудан Астана қаласының ашық чемпионатын, конькимен жүгіру спортынан Қазақстан Республикасының ашық чемпионатын, шорт-тректен Астана қаласының ашық чемпионатын, жаңажылдық кешкі мерекелік бұқаралық жүгіру және Astana run атты қысқы жүгіру жарысын, қысқы триатлон жарысын, дәстүрлі «Бұрқасын-2025» шаңғы фестивалін өткізу жоспары болып жалғаса береді.
– Елордада жыл сайынғы қысқы маусымның ашылуына мыңдаған қала тұрғыны мен қонақтары жиналады. Олардың қатарында мектеп оқушылары, студенттер, күш құрылымдарының қызметкерлері және қоғам өкілдері спорттық шараларға қатысып, өзара күш сынасады. Мұнда жеңіс басты мақсат емес, себебі шаңғы фестивалі – бұл отбасылық және корпоративтік демалыстың ерекше бір түрі, – дейді ол.
Исламбек Байманов айтқандай, биыл Астанада қысқы маусым шаңғы фестивалімен ашылды. Ал 8 желтоқсан күні елордадағы Триатлон саябағында әуесқойлардың қысқы жүгірісі өтіп, жарысқа қатысқан спортшылар 10 шақырым қашықтықты бағындырған болатын. Сондай-ақ Ататүрк саябағында Байқоңыр ауданының ардагерлері бастап, барлығы 50-ге жуық адам қатысқан, ерекше спорт түрі – скандинавиялық жүрістің ұйымдастырылуынан-ақ астаналық қысқы спорт деңгейінің қандай екенін бағамдай беруге болады десек, артық айтқандық емес. Спорттық шараға қатысушы, Байқоңыр ауданы ардагерлер кеңесінің төрағасы Қуаныш Намазшамов скандинавиялық жүрістің бұқаралық спортты дамытуға, саламатты өмір салтын насихаттауға қосар өзіндік үлесі бар.
– «Таза Қазақстан» акциясы аясында ұйымдастырылған шараның басты мақсаты – тұрғындарды түрлі қыстық спорт ойынына тарту. Ашық аспан астында ұйымдастырылған ерекше спорт түріне елордалық қариялар қатысып отырмыз. Ауданымыздың зейнеткерлеріне ешқандай ауа райы кедергі емес. Қариялар ерекше қуанышты. Таза ауада мұндай шараның өткені біздің денсаулығымызға да өте пайдалы. Тағы болса қатысуға дайынбыз. Ардагерлер атынан алғыс айтамыз, – деді ақсақал.
Тілекгүл ЕСДӘУЛЕТ