Астана қаласы мәслихатының депутаттары қаланы дамытудың жоспарын құрып, экономикалық және әлеуметтік бағдарламалар мен бюджетті бекітіп, оның орындалуын қадағалап, қоғамдағы маңызды мәселелерді талқылап, қауіпсіз өмірді қамтамасыз етуде орасан еңбек етті десек болады.
2024 жылды қорытындылаған жиында қалалық мәслихаттың төрағасы Ерлан Каналимов Астана үшін биылғы жыл өте нәтижелі болды деді. Тынымсыз еңбек нәтижесінде депутаттар жыл басынан бері 16 сессия, бюджет, экономика, өнеркәсіп және кәсіпкерлік мәселелері жөніндегі тұрақты комиссияның 7 отырысын, заңдылық, құқық тәртібі және жұртшылықпен жұмыс мәселелері жөніндегі тұрақты комиссияның 13 отырысын, құрылыс, экология, көлік және тұрғын үй-коммуналдық шаруашылық мәселелері жөніндегі тұрақты комиссияның 13 отырысын, сондай-ақ әлеуметтік-мәдени даму мәселелері жөніндегі тұрақты комиссияның 8 отырысын өткізді. Сонымен қатар 35 жұмыс отырысы, 4 қоғамдық тыңдау, 33 «Депутат күні», 5 бірлескен отырыс, 142 нысанның жұмысымен танысып, жұмысшылармен кездесу ұйымдастырды. Мәслихат отырыстарында 200-ден астам мәселе қаралып, тиісті шешімдер қабылданды. Мәслихат төрағасының айтуынша, депутаттар бюджет бағдарламаларын бекіту және бюджет өтінімдерін қалыптастыру үдерісіне қатысу арқылы өз міндеттерін толық көлемде орындады.
– Айта кету керек, биыл мәслихат депутаттары шығыстардың басым бағыттарын ескере отырып, 2025 жылға арналған қаржыландыруды бөлу бойынша ұсыныстарды тиісті лимит аясында екінші рет дайындады. Нәтижесінде, мәслихат депутаттарының тікелей қатысуымен Астананың үш жылдық бюджетіне бірқатар өзгеріс енгізілді, – деді Ерлан Каналимов.
Қаңтар айында өткен кезектен тыс сессияда депутаттар 2035 жылға дейінгі бас жоспар жобасын бірауыздан мақұлдады. Бұл құжатқа сәйкес, 2035 жылға қарай елорда халқының саны 2 млн 275 мың адамға жетеді деп болжануда. Қала 148 секторға бөлініп, инженерлік инфрақұрылымды, көшелер мен жолдарды, сондай-ақ мектептер мен ауруханалар сияқты әлеуметтік нысандарды дамытуға үлкен көңіл бөлінді.
Сонымен қатар 2023 жылдың сәуір айында мәслихат төрағасы Ерлан Каналимов елорда да алтыншы аудан құру туралы бастама көтерді. Бұл бастама, ең алдымен, халық санының өсуі мен азаматтардың қажеттіліктерін ескере отырып, аумақты тиімді басқару мен дамытуды көздейді. Жалпы айтар болсақ, елордадағы Алматы ауданы халық ең тығыз қоныстанған аудандардың бірі болып табылады. Ауданда алты тұрғын алабы бар: «Промышленный», «Железнодорожный», «Интернациональный», «Мичурино», «Күйгенжар» және «Юго-Восток». Аудан аумағы 15 471 гектарды құрайды, ал тұрғындар саны шамамен 400 мың адамға жетті. Тұрғын үй қоры 885 көпқабатты тұрғын үйден тұрады. №1 Индустриялық парк аумағында 51 кәсіпорын жұмыс істейді, ал «Железнодорожный» тұрғын алабында №2 Индустриялық парктің құрылысы жоспарлануда. Осыған байланысты аудан әкімдігі аппаратына түсетін жүктеме айтарлықтай артқан.
Биыл мәслихат депутаттары Қазақстан Республикасы Парламентінің Сенаты мен Мәжілісінің жұмыс топтарының отырыстарына белсенді қатысып, «Құрылыс кодексіне», алкоголь өнімдерін сату ережелеріне, ойын-сауық орындарының жұмысына өзгерістер енгізу бойынша ұсыныстар берді. Сондай-ақ автобус жүргізушілерінің тапшылығының себептерін анықтау және елордадағы қоғамдық көлік жұмысын жақсарту бойынша ұсыныстар жасады. Қазір Мәжіліс депутаттарымен бірге «Елорда мәртебесі» туралы заңға түзетулер енгізу мәселесі талқылануда. Астананың жергілікті ерекшеліктері мен қалыптасқан жұмыс тәжірибесін ескере отырып, жаңа редакциядағы абаттандыру ережелерін бекітті. Мамандар ережелер 4 бөлім мен 176 тармақтан тұрады және жеке, заңды тұлғалардың абаттандыру мен ұстау саласындағы қарым-қатынасын реттейді деп отыр.
– Бұған дейін біз ТҚҚ контейнерлеріне арналған алаңдар мен олардың жағдайына қойылатын талаптарды, ғимараттардың құрылымдық элементтерін тазалау шараларын егжей-тегжейлі сипаттап, сондай-ақ абаттандыру ережелерін бұзушыларды әкімшілік жауапкершілікке тартуға дейінгі профилактикалық шараларды күшейтуді ұсындық, – деп атап өтті мәслихат төрағасы.
Депутаттық корпустың белсенді қолдауымен биыл автобус маршруттары оңтайландырылып, маршруттар желісі кеңейтілді. Бұл қала тұрғындары үшін қоғамдық көліктің қолжетімділігін арттырды. Қоршаған ортаға зиянды әсері аз жаңа заманауи автобустар пайдалануға берілді. Сонымен қатар байланыссыз карталар мен мобильді қосымшалар сияқты жаңа электронды төлем жүйелері енгізіліп, жолақысын төлеу процесі жеңілдетілді. Қарбалас сағаттарда жолаушылардың шоғырлануын азайту мақсатында рейстер саны арттырылды. Қалалық автобус паркі 1 625 автобусты қамтиды және 105 маршрут бойынша қызмет көрсетеді. 2023-2024-жылдары мәслихаттың қолдауымен 706 қазақстандық өндірістегі жаңа автобус сатып алынып, автобус паркінің 45%-ы жаңартылды. Барлық жаңа автобустар пайдалануға берілді. 2025 жылы тағы 300 автобус сатып алу жоспарланып отыр, бұл маршруттар желісін әрі қарай жаңартуға және кеңейтуге мүмкіндік береді.
– Биыл біз елорданың алты ауданының басшыларымен кездесулер өткізіп, шағынаудандар мен тұрғын алаптардағы өзекті мәселелерді анықтауға бағытталған жұмыстар жүргіздік. Көшпелі кеңестердің нәтижесінде жүйелі және ағымдағы бірқатар мәселе анықталды, олардың талдауы депутаттық корпустың қарауына ұсынылады, – деп мәлімдеді Е.Каналимов.
Қоғамда қордаланған мәселелерді талқылау, шешу мақсатында қаланың әкімі, әкімнің орынбасарлары мен басқарма басшыларының қатысуымен «AMANAT» партиясы фракциясының 6 отырысы өтті. Жиында қаланы дамыту туралы 126 тармақ қамтылған бағдарламалық құжат бойынша жұмыстың орындалуы және кейін орындалуға тиіс 4 тармақтың жүзеге асу мерзімі белгіленді.
– Биылғы басты жетістіктеріміздің бірі – елорданың әртүрлі саласын дамыту бойынша қабылданған «Кешенді даму жоспарларының» сәтті жүзеге асуы, – деді Е.Каналимов. Мысалы, «Елордада қылмысқа қарсы күрес, құқықтық тәртіп пен қауіпсіздікті қамтамасыз ету жөніндегі іс-шаралар жоспары» аясында полиция қызметкерлеріне әлеуметтік кепілдіктерді арттыруға қаражат бөлінді, оның ішінде тұрғын үй төлемдері, патрульдік полиция қызметкерлерін формалық киіммен қамтамасыз ету шаралары қарастырылды. Бейнебақылау жүйесі жаңғыртылып, заманауи жабдықтар сатып алынды, жалақы арттырылды.
Сонымен қатар қаланың ТЖД-ның қызметін оңтайландыру, денсаулық сақтау жүйесін дамыту, мәдениет және руханиятты қолдау салауатты өмір қалыптастыру мақсатында бұқаралық спортты дамыту, ардагерлерге қамқорлық және әлеуметтік-тұрмысты жақсарту бағытындағы кешенді жұмыстар жүзеге асырылып жатыр.
Астана мәслихаты тек өңірлік әріптестермен ғана емес, жақын және алыс шетелдік әріптестерімен де тығыз ынтымақтастық орнатып, қалалық мәслихат пен Санкт-Петербургтің Заң шығару органы арасында ынтымақтастық туралы меморандумға қол қойылды. Қазір Мәскеу қалалық думасының депутаттарымен ынтымақтастық туралы меморандум негізінде алдағы бес жылға арналған бірлескен іс-қимыл жоспары қол қою сатысында талқыланып жатыр. Ал Марокко Корольдігіне барған сапар тәжірибе алмасу тұрғысында өте жемісті болды. Жақында астаналық делегация Эстония мен Финляндияға ресми сапармен барып қайтты. Мәслихат төрағасының айтуынша, әрбір сапар – бұл ең алдымен тәжірибе алмасу. Депутаттар тәжірибе алмасу барысында озық үлгілерді жергілікті жағдайларды ескере отырып, бейімдеп енгізуге тырысады.
Ел астанасының әлеуметтік-экономикалық даму бағытындағы жұмыстарын алдағы жылдардағы ауқымды жұмыстардың бастамашысы екені белгілі. Әсіресе, жол қатынасы, көлік жүйесін кешенді дамыту, елорданың қауіпсіздігі, жұмыспен қамту, көгалдандыру, абаттандыру және басқа да маңызды мәселелер бас қаланы өркендетумен қатар, республикамызды дамытуда да маңызды рөл атқарады. Бұл тұрғыдағы негізгі басты міндет – бюджеттік қаражатты бақылау және тиімді пайдаланумен байланысты. Елорда үшін әлеуметтік нысандардың, мектептердің, медициналық мекемелердің пайдалануға берілуі және Қ.Мұнайтпасов атындағы стадионды қайта жаңғыртуды аяқтау, көлік жолайрықтарының, жылу және энергия көздерінің, сондай-ақ инженерлік инфрақұрылымның басқа да нысандарының құрылысын жоспарға сай атқарудың маңызы зор. Қала да, қала халқы да өсіп келеді. Сондықтан халық саны мен инфрақұрылымдардың үйлесімділігі ең басты өзекті мәселе болып отыр.
Мәслихаттың қорытынды жиынында Ерлан Ермекұлы қала тұрғындарын келе жатқан 2025 жаңа жылымен құттықтады.
– Баршаңызға бақыт, денсаулық, қаржылық тұрақтылық және бейбіт аспан тілеймін. Жаңа жыл – бұл ең жарқын мерекелердің бірі. Бұл үміт пен батыл жоспарлардың уақыты. Осы жылдары қол жеткізілген барлық жетістіктер жаңа жеңістерге серпін берсін!, – деді ол.
Тілекгүл ЕСДӘУЛЕТ