Бразилия 25 желтоқсанда Қазақстанның Ақтау қаласы маңында апатқа ұшыраған AZAL ұшағының кабинасындағы дыбыс жазу құрылғысын шешуге кірісті. Бұл туралы Report басылымы бразилиялық G1 порталына сілтеме жасап мәлімдеді, – деп хабарлайды Aikyn.kz.
Ақпаратқа сәйкес, «қара жәшіктер» Бразилияға сәрсенбі күні (Баку уақытымен бейсенбі күні) әкелінген.
Басылымға тергеу барысымен таныс дереккөздің айтуынша, "қара жәшікті" ашу 2 қаңтарда (Баку уақытымен 3 қаңтар) басталған. «Қара жәшіктердегі» деректер Бразилияның Әскери-әуе күштері (Força Aérea Brasileira – FAB) мамандарының қатысуымен талданады.
– Алынған ақпарат оқиғаны талдауға және тергеуге жауапты агенттік – Қазақстанның Авиациялық оқиғаны тергеу комиссиясына беріледі, – деп түсіндірді FAB.
Еске салайық, 25 желтоқсанда Қазақстанның Ақтау қаласына жақын жерде Баку-Грозный рейсін орындаған AZAL жолаушылар ұшағы апатқа ұшыраған болатын. Борттағы 67 адамның 38-і қаза тауып, 29-ы аман қалды.
Әзербайжан президенті Ильхам Әлиевтің Жарлығымен қаза тапқан экипаж мүшелері – Игорь Иванович Кшнякинге, Александр Георгиевич Кальяниновқа, Хокума Джалил гызы Алиеваға Әзербайжанның Ұлттық Қаһарманы атағы берілді.
Апат кезінде аман қалған экипаж мүшелері Зульфигар Сардар оглу Асадов пен Айдан Вагиф гызы Рагимли 1-дәрежелі «Рашадат» орденімен марапатталды.
Алдын ала мәлімет бойынша, ұшақ физикалық және техникалық сыртқы кедергінің салдарынан құлаған.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.