Жалпы, жетекші партияның облыстық филиалы тарапынан жыл бедерінде атқарылған жұмыстары ауқымдылығымен көз қуантады. Әрдайым партия есепті мерзімде Мемлекет басшысының барлық бастамалары мен саяси реформаларын толық қолдау бағытында оңды істерді жүзеге асырып келеді.
Атап айтқанда, 2024 жылы өткізілген жалпыхалықтық референдумда облыс тұрғындары белсенді азаматтық позициясын көрсетіп, саяси науқанға ұйымшылдықпен дауыс берді. Республика бойынша алдыңғы қатардан көрінді.
«Есепті мерзімде өткізілген тағы бір маңызды шара – 38 ауылда әкімдер сайлауы ұйымдастырылды. Саяси науқанда «AMANAT» партиясынан ұсынылған 37 үміткер жеңіске жетті. Сонымен бірге қызмет ауыстырған Шиелі ауданы әкімі лауазымына партия атынан ұсынылған кандидат Айтбай Насриддинұлы Жандарбеков халықтың толық қолдауымен аудан әкімі болып сайланды. Сонымен қатар 31 наурызда шығып қалған депутаттың орнына бірмандаттық сайлау округтері бойынша сайлау өтіп, облыстық және Арал мен Жаңақорған аудандық мәслихаттарына, 8 желтоқсанда қалалық, Шиелі, Сырдария, Қармақшы аудандық мәслихаттарына партиямыздың мүшелері депутат болып сайланды. Бұл партияның нағыз көшбасшы ұйымға айналғанын дәлелдейді. Әрине, бұл жұмыстардың барлығы облыстағы партияның 1 аймақтық, 9 аумақтық филиалдары жанындағы 206 бастауыш ұйымына топтасқан 46 мыңнан астам партия мүшесі мен мәслихаттардағы 152 мандаттың 124-ін иеленіп отырған фракция мүшелерінің және мыңдаған жақтастарының тікелей қатысуымен жүргізілген жұмыстардың жемісі деп білеміз», – дейді облыстық партия филиалының төрағасы Алмасбек Есмаханов.
Өңірде партияның сайлауалды бағдарламасы аясында атқарылған жұмыстар да сан алуан. Бұл тұрғыда «AMANAT» партиясының 2023-2027 жылдарға жоспарланған «Халықпен бірге!» деп аталатын сайлауалды бағдарламасын барлық өңірлерде нақты жүзеге асыру мақсатында арнайы Жол картасы әзірленгені белгілі. Нәтижесінде, былтыр облыста сайлауалды бағдарлама 91,4 пайызға орындалып, Жол картада қамтылған 116 іс-шараның 106-сы жүзеге асырылған.
Соның ішінде бағдарлама шеңберінде өңірде 15 елді мекенді газдандыру жұмыстары жүргізіліп, ауылдарды көгілдір отынмен қамтамасыз ету деңгейі 78 пайызға жетіп отыр.
Сол сияқты бюджеттен бөлінген қаржыға 904 пәтерді құрайтын 16 кредиттік тұрғын үйдің құрылысы жүргізілген. Оның ішінде Қызылорда қаласы Сырдария өзенінің сол жағалауында 7-қабатты 84-пәтерлі 6 тұрғын үй пайдалануға берілгенін ерекше атап өткен абзал.
Қай кезде де өңірде тұрғындарды баспанамен қамту мәселесі өзектілігін жоймақ емес. Бұл тұрғыда былтырдың өзінде тұрғын үй кезегінде тұрған азаматтарды баспанамен қамтамасыз ету мақсатында халықтың әлеуметтік жағынан осал топтары үшін 1 944 пәтер сатып алыныпты. Бұған қоса, Қызылорда қаласында жалғыз баспанасы апатты деп танылған азаматтарға 123 пәтер тапсырылған. Нәтижесінде, азаматтарға 866,8 мың шаршы метр тұрғын үй пайдалануға берілді.
Өңірде барлық салалар бойынша партия тарапынан атқарылған жұмыстар ауқымды. Атап айтқанда, спорт саласы бойынша 4 нысан пайдалануға берілсе, білім саласында «Жайлы мектеп» ұлттық жобасы бойынша 6 900 орындық 10 мектептің құрылысы жүргізілді. Денсаулық сақтау саласы бойынша да бірқатар нысандар пайдалануға берілсе, соның ішінде Арал ауданы Сексеуіл кентінде 40 төсекорынға арналған ауылдық аурухана ел игілігіне табыс етілді.
«Жалпы, 2024 жылы аймақтық және аумақтық филиалдар бойынша Партиялық бақылау комиссияларымен 117 отырыс ұйымдастырылды. Комиссия отырыстары мен мониторинг жұмыстары барысында 543 ұсыныс әзірленіп, оның 398-і орындалды. Қалған ұсыныстар бойынша жұмыс істеліп жатыр. Апта сайын партиялық бақылау комиссияларымен сайлауалды бағдарлама негізінде Жол картасында көрсетілген құрылыс нысандарына рейдтік іс-шаралар ұйымдастырылып, 76 нысанға партиялық бақылау бекеттері орнатылды. Бүгінге дейін осы 76 нысанның 60-ы пайдалануға берілді. Партия филиалдары жанынан құрылған түрлі бағыттағы Кеңестер – Сайлауалды уәделердің уақытылы іске асырылуына үлкен үлес қосып келеді. Есепті кезеңде Кеңестердің 155 отырысы өткізілсе, онда 302 мәселе қаралып, 783 ұсыныстар көтерілді. Жалпы, барлық Кеңестердің жұмысы партияның сайлауалды уәделерінің орындалуына жүйелі бақылау мен бюджет қаражатының тиімді және ашық жұмсалуына мониторинг жасауды қамтамасыз етуде. Сонымен бірге кеңестер түрлі мәселелер бойынша нақты практикалық шешімдерді әзірлейтін диалог алаңдарына айналды», – дейді Алмасбек Әбілқасымұлы.
Бүгінде партия филиалдарында Қоғамдық қабылдау бөлмелері тұрақты қызмет жасауда. Соның негізінде Ашық есік күндері мен «Құқықтық көмек», «Халыққа көмек» партия жобалары аясында тақырыптық қабылдаулар өткізіліп, тұрғындарға тиісті кеңестер мен көмектер көрсетілуде. Бір ғана «Құқықтық көмек» жобасымен өткен 123 қабылдауда 363 тұрғын қамтылды. Сонымен қатар 51 адамға көмек көрсетіліп, 37-сіне құқықтық сүйемелдеу жүргізілген.
«Ауыл аманаты» жобасы бойынша былтыр облысқа республикалық бюджет есебінен 2,5 млрд теңге бөлініп, 150 жоба қаржыландырылды. Қазір қосымша бөлінген 1,5 млрд теңге игерілуде екен. Биылға облысқа «Ауыл аманаты» жобасы аясында 5,5 млрд теңге қаржы қаралып, 815 жобаны қаржыландыру жоспарланып, 886 жұмыс орындарын ашу көзделіп отыр. Сол сияқты «Жер аманаты» жобасы бойынша 2024 жылы жалпы көлемі 77,5 мың гектар жер мемлекетке қайтарылған.
Жалпы, «AMANAT» партиясының ықпалымен жүргізіліп жатқан 11 жобаның әрбірі Сыр өңірінде жоғары маңызға ие. Нақты айтқанда, «Ардагерлерді ардақтайық», «Кедергісіз келешек», «Бақытты отбасы», «Ұлттық мұра», «Кітап–AMANAT» жобаларының ықпалы зор. Былтырғы жылдың өзінде осы жобалар аясында 2 мыңнан аса іс-шара өткізіліп, оларда 38 754 адам қамтылды.
Филиал төрағасының айтуынша, партияның бастамасымен жүзеге асқан «Қарызсыз қоғам» жобасы аясында былтыр 11 мың азаматты оқыту жоспарланып, өңірде 11 210 азамат тегін қаржылық сауаттылығын арттыру курсынан өткен. Биыл 90 күннен астам берешегі бар 9 500 азаматты оқыту жоспарланып отыр.
Партияның аймақтық филиалы жанынан құрылған облыстық «Әйелдер қанаты» мен «Жастар рухы» Жастар қанатының атқарған жұмыстары да жоғары бағаға лайық.
Жалпы, өткен жыл облыстық партия филиалы үшін табысты қорытындыланып отыр. Брифингте филиалы төрағасы алдағы жыл еншісіндегі маңызды міндеттердің ауқымдылығына тоқталып, жүйелі жұмыстар жалғасын табатынын жеткізді.
Ербақыт ЖАЛҒАСБАЙ,
Қызылорда облысы