Атырау облысында қант шығаратын зауыт салынады. Зауыттың нақты орналасатын жері жақында анықталады, – деп хабарлайды Aikyn.kz 24kz-ке сілтеме жасап.
Осылайша, келер жылдың ортасына қарай қант зауыты іске қосылуға тиіс. Инвесторлық жобаны қытайлық компания жүзеге асырады. Жақында облыс әкімдігі мен Қытай компаниясы меморандумға қол қойды.
Облыс тұрғындары жылына 2 мың тонна қант тұтынса, оның 90 пайызын көрші елдерден әкеледі. 2022 жылы қант тапшылығы туындығында тұрғындар әбігерге түскен еді. Енді өңірде жылына 144 мың тонна қант шығаратын зауыт салынады. Оған қытайлық компания қызығушылық танытқан.
– Келер жылдың көктеміне қарай қантқа, яғни нақты өнімге қол жеткіземіз деген ойдамын. 2026 жылдың мамыр, маусым айына қарай өндіріс толықтай іске қосылады деген ниеттеміз. Бұл заманауи техника арқылы қызылшадан қант, ашытқы және басқа да өнімдер өндіруге болады. Жұмыстар кезең-кезеңімен жүргізіледі, – дейді компания басшысы Лина Тайкен.
Қазір зауытты салуға тиімді орын анықталып жатыр. Облыстық әкімдіктің айтуынша, жоба жүзеге асса Атырауды ғана емес, тұтас республиканың сұранысын өтеуге мүмкіндік болады. Жобаның жалпы құны 60 млрд теңгеге жуықтайды.
– Қытайлық жетекші компаниясы жобаны қолдап, қажетті қаражаттың 80 пайызын инвестицияламақ және 20 пайызы «Әлеуметтік кәсіпкерлік корпорациясы» арқылы несиеленеді. Шикізатты жергілікті шаруа қожалықтары өсіріп, жоғарыда аталған компанияға сатады деген сенімдеміз, – деді Кәсіпкерлік және өнеркәсіп басқармасының бөлім басшысы Исмаил Сибатов.
Егін шаруашылығымен айналысатын Енисей Юн 2017 жылы 3 гектар жерге қант қызылшасын еккен. Әр гектардан 80 тоннаға дейін өнім алған. Оның айтуынша, жердің құнарлылығы мен климаттық жағдайы мол өнім алуға қолайлы.
– Су үнемдеу технологиясын пайдаланып, қант қызылшасының үш түрін егіп көрдік. Сапалы өнім алдық. Қанттылығы 21-22 пайызды көрсетті. Бұл - жақсы көрсеткіш. Егер зауыт салынып, шаруалар қант қызылшасын ексе, қосымша жұмыс орындары да пайда болады, – дейді шаруа қожалығының жетекшісі Енисей Юн.
Шикізатты жергілікті жерден өндірген тиімді. Облыстық Ауыл шаруашылығы басқармасы шаруаларға үгіт-насихат жұмыстарын жүргізуді бастап кетті. Диқандар да қант қызылшасын егуге қарсы емес.