Telegraph басылымында жарияланған хабарламаға сүйенген Aikyn.kz ғылыми жұмыстарды бағалауда жасанды интеллект жүйелерін қолданудың пайдасын талдайды.
Сараптама – зерттеушілердің қолжазбаларын алдын ала оқуға, сынауға арналған, жұмыстың сапасы мен дәлдігіне көз жеткізу үшін қажет процесс. Фото linkedin.com сайтынан алынды. Авторлығы: Paul Romani аккаунты
Үкімет бейсенбіде (13 ақпан) Ұлыбританияның ғылымға деген көзқарасын жаңғыртуға бағытталған ЖИ-ді қолданудың жаңа бағыттарын жариялады. Соның бірі – ғылыми жұмыстарды сараптау. ЖИ ғалымдардың көп уақытын алатын сараптамалар дайындауға көмектесіп, әріптестік тексеру нысаны ретінде қолданылмақ.
Сараптама – зерттеушілердің қолжазбаларын алдын ала оқуға, сынауға арналған, жұмыстың жарыққа шығар алдында оның сапасы мен дәлдігіне көз жеткізу үшін қажет ғасырлар бойы қалыптасқан процесс.
Ғылыми зерттеулердің нәтижелерін ЖИ-ді пайдаланып бағалауға арналған 23 ғылыми жобаға жалпы 6 млн доллар бөлінген. Оларға Шеффилд университетіндегі (University of Sheffield) ChatGPT сияқты ЖИ үлгілерін сапаны бағалау құралы ретінде пайдалануды сынау мен Бат университетіндегі (University of Bath) нәтижелерді талдау үшін ЖИ-ды қолданатын «әдістемелік сапаны жақсарту» үшін екі сатылы сараптама процесін сынау жобасы кіреді.
«Жалғыз ЖИ сараптамасы бойынша біз шешім қабылдамаймыз. Біз кейбір сынақ деректерін талдау үшін ЖИ-ді зерттеу құралы ретінде қолданамыз. Сайып келгенде, біздің мақсатымыз – ғылыми зерттеулердің сапасы мен сенімділігін арттыру», – дейді Бат университетінің ғалымы Кэтрин Баттон.
Бұл сынақтар әлемнің жетекші ғылыми журналдарын шығаратын Sage және Royal Society компаниясымен серіктестікте жүргізілуде.
Ұлыбританияның Ғылым министрі: «ЖИ бірқатар секторларда жаңа мүмкіндіктер ашады. Ол өсуді ынталандырып, ғалымдарды күнделікті қағазбастылықтан босатады». BBC News сайтынан алынды. Авторлығы: Martin Giles
Ғалымдар сараптама процесінің маңызын жақсы түсінеді. Ғылыми еңбектің нәтижелері жарияланбас бұрын ол бірнеше сараптамадан өтеді, тәуелсіз сарапшылар қолжазбаларды мұқият зерттейді. Бұл процесс нашар зерттеулерді жоюға, қате талдауларды анықтауға, алаяқтықтың алдын алуға, мақалалардың сапасын жақсартуға және ғылым мен журналдардың сенімділігін қамтамасыз етуге арналған. Ұлыбританияның Ғылым министрі лорд Вэлланс былай деді:
«ЖИ бірқатар секторларда жаңа мүмкіндіктер ашады. Егер зерттеушілер ЖИ-дің ғылымның ашықтық, сенімділік пен нақтылығын жақсарта алатын әлеуетін көрсете алса, онда бұл өсуді ынталандыра отырып, ғалымдарды күнделікті қағазбастылықтан босатады».
Ғылым жөніндегі мемлекеттік хатшы Питер Кайл жақында Ұлыбританияның ЖИ-дің супердержавасы болуы үшін: «Біз жаңа мүмкіндіктер, жаңа өсу үшін, мемлекеттік қызметтерді жақсарту және жасанды интеллектегі көшбасшылығымызды нығайту үшін Ұлыбританияның түкпір-түкпірінен тәжірибені пайдалануға дайын боламыз», – деген еді.
ЖИ-дің ғылымға оң және теріс әсерін зерттейтін жобаларды қаржыландыруға арнайы стипендиялар бөледі. Фото brookes.ac.uk сайтынан алынды
Ғылым, инновациялар және технологиялар департаменті ЖИ-дің ғылымға оң және теріс әсерін зерттейтін жұмыстарды қаржыландыруға арнайы стипендиялар бөлуді бастайды. Бұл жобалар да ғылымда ЖИ-ді пайдаланудағы әлеуетті этикалық мәселелерді зерттейді. Мысалы, олар біржақтылық, ашықтықтың болмауы және жұмыс орындарының қысқаруы сияқты ықтимал экономикалық әсерлерін зерттейді.
Жақында министр Вэлланс Кембридж-Оксфорд дәлізіне жауапты болып тағайындалды. Бұл ғылым министрінен бөлек лауазым және тікелей канцлерге есеп береді. Жаңа қызметінде министр Вэлланс үкіметтің іс-қимылдарын бизнеспен үйлестіріп жүргізу арқылы Оксфорд, Лондон және Кембридж «алтын үшбұрышын» Еуропаның кремний алқабына айналдыруға болады деп сенеді.
Жасанды интеллект бүгінде британдық үкіметтің саяси шешімдерін бағалау құралы ретінде де қолданыла бастады.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.