АҚШ президенті Дональд Трамп Конгреске жолдауын жариялады. Бұл оның өз міндетіне кіріскелі жасаған алғашқы үндеуі, – деп хабарлайды Aikyn.kz 24kz-ке сілтеме жасап.
Дәстүрлі шарада Ақ үй басшысы президенттігінің алғашқы апталарындағы жұмысын қорытындылады. Ол Америкаға ағылған заңсыз мигранттардың саны рекордтық көрсеткішке дейін азайғанын мәлімдеді. Жаңадан құрылған "үкімет тиімділігі департаменті" жұмысының нәтижесінде миллиардтаған доллар үнемделгенін айтты.
Сондай-ақ салықты азайтып, өнеркәсіптік өндірісті қалпына келтіруге уәде етіп, америкалықтар үшін "алтын ғасыр" енді басталғанын жеткізді. Демократтар мұның өтірік екенін айтып, өз наразылығын білдірсе, республикашылдар зор қошемет танытты.
Ақ үй басшысы халықаралық саясатқа да тоқталды. Келешекте Панама каналын қайтарып, Гренландияның АҚШ құрамына өтетінін мәлімдеді. Бұған дейін маңызды серіктестері Канада мен Мексика үшін тарифтерді көтеру бойынша ұстанымынан бас тартпайтынын кесіп айтты.
Дональд Трамп Украинадағы ахуалды да қозғап, Владимир Зеленскийдің қарулы қақтығысты тоқтату үшін келіссөздерді жалғастыруға дайын екенін жеткізді.
– Мен Украина президенті Владимир Зеленскийден маңызды хат алдым. Ол келіссөздерге дайын екенін айтты. Зеленский бәрінен бұрын бітімді украиналықтардың қалайтынын жеткізді. Сондықтан менің жетекшілігіммен жұмыс істеуге дайынмын деді. Біз үшін кез келген қолайлы уақытта пайдалы қазбалар және қауіпсіздік туралы келісімге қол қоюға әзір екенін айтты. Мен бұл хатты жоғары бағалаймын. Сонымен қоса Ресей тарабы да бізге бітімге дайын екенін білдіретін нақты белгілер берді, – деп мәлімдеді АҚШ президенті Дональд Трамп.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.