Reuters хабарламасына сүйеген Aikyn.kz президент әкімшілігіне криптовалюта қоры не үшін қажет болғанын түсіндіреді.
АҚШ биткоинды ұзақ мерзімді стратегиялық актив – цифрлық Fort Knox – ретінде қолданбақшы. Фото en.cryptonomist.ch сайтынан алынды. Авторлығы: генеративті ЖИ
Жыл басынан бері президент әкімшілігі криптовалюталарды мемлекеттің экономикалық және қаржылық жүйесіне интеграциялауға бағытталған маңызды қадамдар жасады. Жұмада (7 наурыз) Ақ үйде цифрлық активтерге арналған алғашқы саммит өтіп, стратегиялық биткоин резервін құру мәселесі талқыланды. Бұдан бір күн бұрын 6 наурызда президент Трамп стратегиялық биткоин резервін құру туралы жарлыққа қол қойды. Резерв қылмыстық және азаматтық істер барысында тәркіленген криптовалюталар есебінен жасалатын болады.
Идеяның басты мақсаты – биткоинды ұзақ мерзімді стратегиялық актив ретінде сақтау, оны цифрлық Форт-Нокс (Fort Knox – Американың алтын қорын сақтайтын қойма) ретінде пайдалану. Трамп әкімшілігі салық төлеушілерге қосымша шығын түспейтінін, резерв мемлекет тәркілеген криптовалюталар есебінен ғана жиналатынын мәлімдеді.
2025 жылдың 7 наурызында Ақ үйде криптовалюта индустриясының көшбасшыларымен кездесу өтті. Оған MicroStrategy компаниясының бас директоры Майкл Сейлор, Coinbase негізін қалаушылардың бірі Брайан Армстронг, сондай-ақ Gemini Trust компаниясының иелері Кэмерон мен Тайлер Уинклвостар, кәсіпкер Дэвид Брейли қатысты.
Кездесу барысында Трамп АҚШ-ты криптовалюта саласындағы әлемдік көшбасшы жасайтынын мәлімдеп, биткоин резервін құру осы мақсатқа жетудегі маңызды қадам екенін атап өтті.
АҚШ-тың бүкіл алтын қоры осы шағын ғимаратта сақталады. Фото moneyman.ru сайтынан алынды
Мемлекеттік стратегиялық биткоин резервін құру туралы хабарландыру нарықта екіұдай реакция тудырды. Кейбір инвесторлар үкіметтің биткоин сатып алуға қатысты батыл әрекеттерін күтті. Бірақ жарлық жарияланғаннан кейін криптовалюта бағасы аздап төмендеді.
Блокчейн индустриясының көптеген көшбасшылары бұл бастаманы құптады. Оны биткоинды стратегиялық актив ретінде мойындау және криптовалюталардың заңды мәртебесін арттыру жолындағы маңызды қадам деп бағалады.
Бастаманы қолдаушылармен қатар, оған сын айтқандар да болды. Кейбір сарапшылар Дональд Трамп пен оның жақын айналасының криптовалюта жобаларына жеке инвестиция салу ықтималдығына байланысты мүдделер қайшылығы болуы мүмкін екенін айтуда. Сонымен қатар, биткоин резервін құрудың ашықтығы мен қаржылық жүйеге ықтимал әсері туралы сұрақтар қойыла бастады.
Fort Knox-та сақталуы тиіс 4 583 тонна алтын құймалардың бар-жоғын президент Дональд Трамп миллиардер Илон Маскпен бірге тексермекші. Фото business-gazeta.ru сайтынан алынды
Қорытынды ақпарат
Жоғарыда айтылғандай, мемлекеттің стратегиялық биткоин резерві қылмыстық және азаматтық істер барысында тәркіленген криптовалюталар есебінен жасалады. Ақ үйдің мәлімдеуінше, қазір АҚШ-та шамамен 200 000 BTC бар. Қазіргі нарықта бұл шамамен 18 миллиард долларға тең. Президент Трамп қол қойған жарлық федералдық үкіметтің қарамағындағы барлық цифрлық активтерді толық есепке алуды талап етеді.
Бұдан бөлек, АҚШ-тың жаңа стратегиялық биткоин резервінің маңызды ерекшеліктерінің бірі – BTC сатылмайды, керісінше, жинақтау құралы ретінде қолданылады.
Биткоин резервін құру және Ақ үйдегі цифрлық активтер саммитін өткізу – Трамп әкімшілігінің криптовалюталарды АҚШ экономикасының бір бөлігі ретінде қабылдауға ұмтылысын көрсетеді. Бұл цифрлық активтерді мойындау мен реттеудің жаңа кезеңі болуы мүмкін. Дегенмен бұл бастама қаржылық ашықтық, әділдік және ұзақ мерзімді тұрақтылық мәселелеріне байланысты маңызды сұрақтар тудыруда. АҚШ-тың бұл шешімі әлемдегі криптовалюта нарығына да әсер етіп, оның дамуына жаңа мазмұн беруі мүмкін.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.