Астана қаласы Полиция департаментінің Киберқылмыспен күрес басқармасының қызметкерлері Қазақстан Республикасы Ұлттық қауіпсіздік комитеті Орталық аппаратының қызметкерлерімен бірлесіп, Астана қаласы прокуратурасының келісуімен арнайы техниканы пайдаланып, Қазақстанның барлық аумағында алаяқтық қоңыраулар ұйымдастырған 42 жастағы шетелдікті ұстады, – деп хабарлайды Aikyn.kz елорда әкімдігінің ресми сайтына сілтеме жасап.
Ер адам Барселонадан Астанаға ақша табу үшін келген. Telegram желісінде белгісіз біреу оған жүріп бара жатқан көліктегі GSM қорапшасының тоқтаусыз жұмыс істеуі үшін 3 мың доллар ұсынған.
Күдіктінің автокөлігін тінту барысында екі GSM бокс құрылғысы, 19 SIM-карта және Wi-Fi роутері табылып, тәркіленді.
Сондай-ақ, 20 және 26 жастағы екі Қазақстан азаматы да ұсталды.
«Жастар әлеуметтік желілер арқылы нұсқау алып, куратордың нұсқауы бойынша жұмыс істеді. Олардың міндеті SIM карталарын тіркеу және оларды GSM қораптарына орнату болды. Жұмыстары үшін олар күн сайын «Криптобот» арқылы 100 АҚШ долларына тең криптовалюта алып отырды, содан кейін қаражат олардың шоттарына аударылды», – деп хабарлады полиция.
Ұсталғандар қылмыстарын мойындап, олардың үстінен қылмыстық іс қозғалды. Олар қазір қамауда отыр.
Полицейлер қылмыскерлердің әрекетінен зардап шеккендерді анықтауда. Жұмысқа құрылғылар арқылы өтетін трафиктің бастамашысы мен соңғы алушысын анықтауға көмектесетін IT мамандары тартылған.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.