Денсаулық сақтау министрлігінің мәліметінше, 67 жастағы науқас биыл ақпанда алдымен «Жүректің ишемиялық ауруы, ФК III кернеу стенокардиясы» диагнозымен ауруханаға жатқызылады. Алайда ота алдындағы медициналық тексеру кезінде науқастың сол жақ бүйрегінен қатерлі ісік анықталған.
«Бұл орайда, яғни науқасқа екі күрделі диагноз қатар қойылған кезде дәрігерлер аса маңызды шешімдер қабылдауы қажет. 67 жастағы науқастың бастапқы диагнозына да күрделі ота қажет. Ал бүйрегіндегі қатерлі ісік жағдайды тіптен қиындатқан еді. Екі бөлек ота жасау науқастың өміріне тіптен қауіп төндіріп тұрды. Алдымен бүйректі алып тастаса, жүрекке түскен жүктеменің салдарынан инфаркт қаупі жоғарылайтын еді. Ал жүрекке жасалған операция қатерлі ісік жасушаларының қанайналым жүйесі арқылы таралуына себеп болуы мүмкін», – дейді Павлодар кардиоорталығының дәрігерлері.
Барлық факторды ескере отырып, дәрігерлер бір мезгілде екі отаны қатар жасауға және симуляциялық араласу әдісін қолдануға шешім қабылдады. Ота барысында алдымен нефрэктомия (бүйректі алып тастау), содан кейін жүректі шунттау жасалды. Операцияға кардиохирургтер, онкологтар, анестезиологтар, трансфузиологтар және операциялық мейіргерлер қатысты. Күрделі медициналық ота сәтті өтіп, науқас оңалу кезеңінен кейін ауруханадан шығарылды, қазір жағдайы қалыпты.
Дәрігерлердің айтуынша, осындай аралас операциялар оңалту кезеңін қысқартып, шұғыл кардиохирургиялық емдеуді қажет ететін онкопатологиясы бар пациенттерге уақытылы көмек көрсетуге мүмкіндік береді.
Н.ОРАЗҒАЛИ