Әл-Фараби атындағы ҚазҰУ Журналистика факультеті мен республикалық «Ұлан» газеті бірлесе ұйымдастырған дәстүрлі «Жас тілшілер» форумы өтті.
Байқаудың мақсаты – жас тілшілердің шығармашылық ізденістерін арттыруға, тың ойларын жүзеге асыруға ықпал ету. Дәстүрлі форумның жарты ғасырға жуық тарихында жеңімпаз атанған жас тілшілер бүгінде майталман мамандар қатарынан бой түзеді. Сондықтан форум арқылы жас дарындардың шығармашылығын көпшілікке кеңінен насихаттауға жол ашу басты міндет. Форумның ашылу салтанатында әл-Фараби атындағы ҚазҰУ Журналистика факультетінің деканы Қанат Әуесбайға және филология ғылымдарының докторы, профессор, оқытушы Кәкен Қамзин сөз сөйледі.
Сонымен қатар жас өрендерге медиа маман, журналист Әміре Жәнібек «Қазіргі медиаэтика: Нені ескеру қажет?», Аяжан Бауыржанқызы «Журналистикадағы жаңа трендтер» аясында арнайы дәріс оқыды. Аталған іс-шараға Журналистика факультетінің оқытушылары, студенттері, балалар мен жасөспірімдерге арналған республикалық «Ұлан» газетінің жас тілшілері атсалысты. Журналистика мамандығының студенті Мөлдір Түктібай, Кино және медиа мамандығының студенті Аружан Қадіржұма және Медиакоммуникация мамандығының студенті Аяулым Ернатқызы мамандықтарының ерекшелігін айшықтап, оқуға құжат тапсыру, шығармашылық емтихан жайлы слайд қорғады. Белсенді студенттердің бірі Ерболат Дамир авторлық «Шынымен ұнайды» әнін шырқап, Тлеміс Саят «Нәшәр журнәлістің кеңесі» атты кітабын таныстырды.
Байқауға қатысушылар «Үздік мақала», «Үздік видео-сұхбат», «Үздік аудио-подкаст» номинациялары бойынша марапатталды.
«Үздік мақала» номинациясының 1-орын иегерлері: Балмекен Қапалбай, Гүлшат Көптілеуова, Ұлданай Мақсұт, Гауһар Абдулла.
«Үздік видео-сұхбат» номинациясының 1-орын иегерлері: Нурай Марат, Амина Тұрдақын.
«Үздік аудио-подкаст» номинациясының 1-орын иегерлері: Дүйсенхан Талшын, Талғат Амина.
Ал Бас жүлде «Ең үздік жас тілші-2025» марапатын Дильназ Ердембекова еншіледі. Жылдағы дәстүр бойынша әр буын келесі буынға «Ең үздік жас тілші» марапатын табыстайды. Бұл жүлдені биыл Журналистика факультетінің 1-курс студенті, «Ең үздік жас тілші-2024» иегері Диана Агзамова келе алмағандықтан, бұл міндетті Журналистика факультетінің 2-курс студенті, «Ең үздік жас тілші-2023» атанған Нұрбибі Айтбайқызы орындады.
Байқау жеңімпаздарына ҚазҰУ төсбелгісі, статуэтка, естелік бөтелке мен кітаптар тарту етілді. Айта кетейік, жазушы Ырысбек Дәбей мен Қанат Әбілқайыр жас тілшілерге авторлық кітаптарын сыйлап, демеушілер қатарында болды. Бұдан бөлек, форумның демеушілері Журналистика факультетінің оқытушысы Назым Тенельбаева, Spacenglish орталығының директоры Айбек Шегебай, BAQ media шығармашылық орталығының негізін қалаушы, журналист Ербол Медетбекұлы. Демеушілер топ жарған үздік қатысушыларға ағылшын тілі курсына және шығармашылық емтиханға дайындық курсына тегін сертификаттар сыйлады. Шара соңында әділқазылар алқасы ҚазҰУ оқытушылар құрамы Берікбол Төлеген, Башанова Құралай, Қастай Дастан қорытынды сөз айтты. Башанова Құралай «Үздік мақала» номинациясының 1-орын иегері Коптлеуова Гульшатқа жазушы, драматург Дулат Исабековтің «Қарғын» кітабын тарту етті.
Қара шаңырақтың табалдырығын аттаған мектеп оқушылары мен талапкерлердің балбұл жайнаған жанарына қарап-ақ бұл форумда жеңімпаз атану олар үшін қаншалық маңызды болғанын түсінуге болады.
Нұрбибі Алчинова,
Журналистика факультетінің 2-курс студенті
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.