Алматы қаласының тұрғыны, мұғалім Аида Мұсаева 16 жастағы шәкірті Айдостың жоғалып кеткенін айтты, – деп хабарлайды Aikyn.kz сайты.
Оның айтуынша, оқыс оқиға Мамыр-3 ықшамауданында 10:54 шамасында болған. Жасөспірім үйден қоқыс шығаруға шығып кеткен, алайда қоқыс жәшігіне дейін жетпеген. Жоғалғанға дейінгі соңғы сәт бейнебақылау камерасына түсіп қалған: кадрларда Айдостың автотұрақтың жанында жүргені байқалады.
Аида Мұсаева баланың мінезі тыныш, ешкіммен ұрыспайтын, ескертусіз кетіп қалатын әдеті жоқ екенін айтады.
Қазіргі таңда оқушыны іздеу жұмыстары жүргізіліп жатыр.
"Айдос – менің ұстазымның баласы, әріптесімнің ұлы әрі менің оқушым. Ол Қызылордадан келген, Алматыда ем қабылдап жүрген. 29 шілде күні полицияға ресми түрде арыз жазылды. @lider.kz еріктілері Айдостың жоғалғанын растады. Бұл оқиға қашып кетуге ұқсамайды. Ата-анасының ешқандай қарызы, отбасылық қиындықтары да жоқ. Құрметті, ағайын, егер Айдос туралы қандай да бір ақпаратыңыз болса, дереу хабарласыңыз", – деп жазды Аида Мұсаева.