Қазіргі уақытта мемлекеттен тұрғын үй алу кезегінде 642 мың азамат тұр, – деп хабарлайды Aikyn.kz сайты naryk.kz сайтына сілтеме жасап.
Алайда, олардың тек 14%-ы ғана пәтер алуға құқығын растау үшін жаңартылған деректерді ұсынған, деп хабарлады «Отбасы банк» Басқарма төрайымы Ләззат Ибрагимова.
«642 мың кезекте тұрғандар туралы деректерді алған кезде, ешкім инвентаризация жүргізбегенін, яғни кезекте тұрғандар тізімі тек нөмірлері мен ЖСН бойынша берілгенін білдік, бірақ мәселе одан да тереңдеп кетті. Бізде актуалды телефон нөмірлері жоқ, адамдардың тіркеуі туралы, отбасы құрамы туралы мәліметтер сәйкес келмейді», – деді ол
Осыған байланысты «Отбасы банк» мемлекеттен тұрғын үйді шынымен мұқтаж адамдар ғана алуы үшін, кезекте тұрғандардың деректерін актуалдандыруды шешті.
«Бүгінгі таңда біз төрт ай бойы осы деректерді өзектендіру үшін орасан жұмыс жасап жатырмыз, бірақ кезекте тұрғандардың көпшілігі мемлекеттік қолдау шараларына сәйкес келмегендіктен, келісім беруден бас тартып жатқанын байқадық. 2025 жылғы 30 қарашадағы жағдай бойынша 14% ғана: 642 мың кезекте тұрғандардың тек 92 092-сі ғана өз келісімін берді», – деді ол.
Оның сөзінше, кезекте тұрғандардың көбі әскери қызметкер, мемлекеттік қызметші және басқа да жеңілдіктер санатының белгілеріне сәйкес келмейді. Сонымен қатар көпшілігінің балалары өсіп кеткен немесе отбасынан біреу тұрғын үйді сатып алған.
«Сәйкесінше, олар да тізімнен шығарылатынын түсінеді», – деді ол.
Алайда, жүйе оларды есептен шығарып, шынымен тұрғын үйге мұқтаж және барлық критерийлерге сәйкес келетін кезектегі келесі қатысушыларға тұрғын үй беруге мүмкіндік бермейді.
Ибрагимова деректерді жаңартуға келісім бермеген кезекте тұрғандардың, іс жүзінде, процесті тежеп тұрғанын атап өтті – олардың кесірінен тұрғын үй беруді жалғастыру және кезектің келесі қатысушылары үшін конкурстық рәсімдерді өткізу мүмкін емес. Оның айтуынша, жүйе 2007 жылы кезекке тұрғандармен бұл процесті аяқтамайынша, 2008 жылғы кезекте тұрғандарға тұрғын үй беруге көше алмайды.
«8 желтоқсаннан бастап Өнеркәсіп және құрылыс министрлігінің бұйрығына өзгерістер енгізілді. Егер адам осы жалдамалы тұрғын үй бойынша жеке деректерді өңдеуге келісім бермесе, онда жүйе 2007 жылғы кезекте тұрғандардан 2008 жылғы кезекте тұрғандарға көшеді. Әйтпесе, біз мемлекеттен тұрғын үй бөлу процесін жылдар бойы жасауға мәжбүр болар едік», — деді ол.