Кеңес мүшелері халықтың мәдени іс-шаралармен қамтылуы, өңірдің көрнекті тұлғаларының мерейтойлық күндерге арналған іс-шаралары туралы есепті тыңдады. Сонымен қатар 2025 жылға арналған жұмыс жоспары қорытындыланып, келер жылға жоспарлар ұсынылды.
Кездесуге қала және аудан әкімдерінің орынбасарлары, мәдениет бөлімдерінің басшылары қатысты.
– Жол картасы бойынша 2025 жылдың қаңтарынан желтоқсанына дейін 7760 іс-шара өткізілді. Бірнеше ірі жоба жүзеге асты, оның ішінде «Барлығына арналған өнер», STREET BEAT KRG, ARQA Fest фестивалі, «Ерекше қос жұлдыз», «Қарағанды вернисажы», «Ұлттық қолөнер – асыл қазына», «Қарашада өмір түр» поэзия кештері сериясы және «Жұмысшы мамандықтар жылы» аясындағы «Еңбекке тағзым» жобасы, – деп атап өтті «AMANAT» партиясы Қарағанды облыстық филиалының төрағасы Бекзат Алтынбеков.
Айта кету керек, жыл бойы маңызды мерейтойлар мен естелік күндерді атап өтуге арналған іс-шаралар назардан тыс қалған жоқ. Абай Құнанбаевтың 180 жылдығына арналған театрландырылған бағдарлама және концерттер өткізілді. Алаштың 120 жылдығы аясында Алаш ғалымдарының қатысуымен ұйымдастырылған дәрістерге халық көп жиналды.
Наурыз мейрамында көшпелі іс-шаралар, флешмоб, ұлттық киімдер сән көрсетілімі, «Наурыз керуені» мерекелік автобусы жүріп, қалалық саябақтар мен мәдени мекемелердегі концерттер ұйымдастырылды. 7 және 9 мамырда, Қазақстан Республикасы Конституциясының 30 жылдығына, Республика күніне арналған патриоттық ән фестивалі, мерекелік концерттер де жоғары деңгейде өткізілді.
Биыл Қазақстан ғылымының, әдебиетінің және өнерінің көрнекті тұлғаларының маңызды мерейтойларына ерекше көңіл бөлінді. Академик Евней Бөкетовтің 100 жылдығына орай Қарағанды орталықтандырылған кітапхана жүйесінің филиалдары көптеген іс-шара өткізді. Ақын Серік Ақсұңқарұлының 75 жылдығына орай шығармашылық кеш ұйымдастырылды. Татар ұлттық филармониясының 210 жылдығы атап өтіліп, Ұлттық домбыра күні аясында Орталық саябақтың тұрақты сахнасында «Домбыра – Асылмұра» атты кең көлемді флешмоб құрылды.
Кеңес шешімі бойынша мәдени іс-шараларды ұйымдастыру және өңірдің көрнекті тұлғаларының мерейтойлық күндерін насихаттау жұмыстары жүйелі түрде жалғасатыны айтылды.
Әдебиет БЕЛГІБАЙҰЛЫ,
Қарағанды облысы