Әнші Димаш Құдайберген жас өнерпаз Садраддиннің Алматыда өткен жеке концертін жоғары бағалап, оның анасы Айгүл Есқараға жылы лебізін білдірді, – деп хабарлайды Aikyn.kz сайты.
Димаш концерттен үзінділерді көргенін айтып, өнердегі інісінің жетістігіне қуанғанын жеткізді. Ол Садраддиннің шығармашылық жолына сәттілік тілеп, алдағы уақытта халықаралық деңгейге шығып, әлемнің ірі сахналарында өнер көрсетуіне тілектестік білдірген.
Сондай-ақ әнші ұлының жетістігіне қуанып отырған Айгүл Есқараның көңіл күйі өзіне ерекше әсер еткенін атап өтті. Ол анаға баласының әрбір жетістігіне осылай қуанып, ұзақ жылдар бойы қызығын көруді тіледі.
Димаш шетелдегі дайындықтарына байланысты Алматыдағы концертке қатыса алмағанын да түсіндірген. Оның айтуынша, сол кезде елде болғанда Садраддинге қолдау көрсету үшін концертке міндетті түрде барар еді.
Садраддиннің анасы Айгүл Есқара Димаш Құдайбергеннің жылы лебізіне ризашылығын білдірді. Оның сөзінше, әлемдік сахнада Қазақстанды танытып жүрген өнерпаздың жас әріптесіне қолдау көрсетуі олар үшін ерекше маңызды.
Айгүл Есқара өнер адамдарының бір-бірінің жетістігіне қуанып, қолдау көрсетуі маңызды екенін де айтты. Ол қазақ өнерпаздарының өсіп, үлкен жетістіктерге жеткенін қалайтынын жеткізді.
Сондай-ақ ол Димаштың Садраддиннің шығармашылығына бұрыннан қолдау көрсетіп келе жатқанын атап өтті. Оның айтуынша, әнші жас әріптесінің қуанышты сәттерінде жылы лебізін білдіріп отырады.