Астанада San-Andreas, MOOZ, Zadira және «Царство Аида» есірткі дүкендерінің қызметіне қатысты үш қылмыстық іс бойынша сот үкімдері заңды күшіне енді, – деп хабарлайды Aikyn.kz сайты.
Ұйымдасқан қылмыстық топтардың 18 мүшесі ұзақ мерзімге бас бостандығынан айырылды.
Қалалық прокуратураның мәліметінше, тергеу барысында есірткі саудасымен айналысқан қылмыстық топтардың құрылымы анықталған. Олардың құрамында ұйымдастырушылар, есірткі сақталатын қоймаларға жауапты куратор және тыйым салынған заттарды жасырын орындарға жеткізген курьерлер болған.
Сот шешімімен ұйымдасқан қылмыстық топтардың 18 мүшесі 16 және 17 жылға бас бостандығынан айырылды. Сондай-ақ сотталғандардың ақша қаражаты, цифрлық активтері, жылжымайтын мүлкі мен автокөліктері мемлекет кірісіне тәркіленді.