Солтүстік Қазақстан облысында қоғам белсенділері пластик қалдықтарын қайта өңдейтін зауыт ұжымымен Жолдауда айтылған отандық өндірісті дамыту және ресурстарды тиімді пайдалану міндеттерін талқылады. Зауытта қалдықтардан тұрмыстық бұйымдар жасауға қажетті шикізат дайындалады.
Астанада «Әділет» партиясының өкілдері Л.Гумилев атындағы Еуразия ұлттық университетінің студенттерімен кездесіп, Жолдаудың негізгі бағыттары, тұрғын үйлер, жолдар, ауруханалар мен мәдениет нысандарын салу жоспарлары, сондай-ақ экономика мен салық жүйесіндегі алдағы өзгерістер туралы айтылды.
Ал Атырау облысында мұнай-газ саласын жаңғырту, энергетикалық қауіпсіздік және экономиканы әртараптандыру мәселелері талқыланды. Кездесу барысында шикізатты терең өңдеу, қосылған құны жоғары өнім шығару, өндіріс ісін жетілдіру және еңбек қауіпсіздігін күшейту міндеттері сөз болды.
«Әділет» партиясы Атырау облыстық филиалы төрағасының орынбасары Бейбіт Мырзағалиев Жолдаудағы басымдықтардың мұнай-газ кәсіпорындары үшін де өзекті екенін жеткізді.
– Мұнай-газ кәсіпорындары үшін бұл – өндіріс тиімділігін арттырумен қатар, еңбек қауіпсіздігін күшейтіп, ресурстарды ұтымды пайдалануға мүмкіндік беретін бағыттар. «Әділет» партиясының бағдарламасы да әділ әрі бәсекеге қабілетті экономиканы құру, отандық өндірісті қолдау, кәсіпкерлікке тең мүмкіндік жасау және цифрлық технологияларды дамыту міндеттерімен сабақтасады, – деді төраға орынбасары.
Жиын барысында «Ембімұнайгаз» бастауыш партия ұйымының төрағасы сайланып, ұйымның алдағы жұмыс бағыттары айқындалды. Сондай-ақ Жолдаудағы міндеттерді еңбек ұжымдары арасында түсіндіру және қызметкерлердің ұсыныстарын жинақтау жөнінде шешім қабылданды.
Үш өңірдегі кездесуде көтерілген мәселелер әртүрлі болғанымен, олардың барлығы елдің экономикалық әлеуетін арттыру, адами капиталды дамыту және халықтың өмір сапасын жақсарту міндеттерімен сабақтас. Өңірлердегі түсіндіру жұмыстары осы басымдықтарды нақты салалардың тыныс-тіршілігімен байланыстыра талқылауға бағытталған.
Бекбол АМАНГЕЛДІ