Алматының бас санитарлық дәрігері Жандарбек Бекшин қала тұрғындарына адам толы автобустарға отырмауға кеңес берді.
Қоғамдық көліктер халықты орындықтарға отырғызып қана тасымалдауы керектігі туралы қаулы сақталмай жатқанын онлайн брифинг барысында журналистер айтты.
«Иа, бұл қаулыны сақтау қиын болып тұр. Кондукторлар жоқ болғандықтан, бұл процесті реттеу оңай емес. Автобустар жолаушыларды толтырып алып жүрмеуі керек. Жолаушылардан адам толы автобусқа мінбеуді сұраймыз. Қоғамдық көлікте отыратын орын санынан артық адам болмауы керек», - деді ол.
Бас санитарлық дәрігер карантин шараларының сақталуын полиция бақылайтынын ескертті.
«Жолаушылар өздері қашықтық сақтауы керек. Автобус жүргізушілеріне талапты орындау өте қиын. Сондықтан, біз жолаушылардың түсіністігіне сенеміз», - деді ол.
