Елорда аумағындағы «жасыл белдеудегі» 23 шақырымдық велосипедшілерге арналған жол – қала тұрғындар үшін табиғат аясында демалатын орындардың бірі. Велотрасса Қорғалжың тасжолы мен Қараөткел, яғни Қосшы кентіне қарай өтетін жолды жалғайды. Ол жер карантин кезінде елордалықтар үшін демалуға таптырмас орындардың бірі. Мұнда тапырлап жүрген адамдардың қарасы көрінбейді. Демалыс күні екенін ескеріп қарағанның өзінде де, тек анда-санда көзге сағымдай көрінетін велесипедшілер мен балаларын жетектеген бірлі-жарымды адамдарды ғана кездестіресіз.
«Жасыл белдеудегі» ені 2 метрлік велотрасса 2016 жылы пайдалануға берілсе де қалалықтар үшін аса танымал емес екенін көруге болады.
«Мен осы қалада 10 жылдан астам тұрамын. Бірақ осындай керемет демалуға мүмкіндік беретін орынның барын бірінші рет өз көзіммен көріп отырмын. Он жыл қалада тұрып осындай жердің барын білмеу ұяттау сияқты (күлді). Өзіңіз білесіз, жай күндері елордада көп адамның анда-мында баруға, демалуға уақыттары болмай жатады. Уақыт шықса, табиғат деп балаларымды алып Бурабайға кетіп қаламыз, сол жақтан талай велесипед жалға алып тепкенім бар. Енді мына жер керемет екен, карантин жақсы болды», - дейді елордалық Айдын.
Алайда, біз мұндағы адамдардың өте аз болу жағдайының бір себебі велесипедті жалға беру қызметінің әлі қосылмағаны. Оның үстіне Қорғалжың тасжолы жағы мен оның екінші шетінде де үлкен құрылыстар жүріп жатыр.
«Велосипедтерді жалға беру қызметіне әлі рұқсат берілген жоқ сондықтан біздің жұмысымыз тоқтап тұр. Бірақ өзіңіз көріп тұрсыз мына жерде құрылыс қарқынды жүріп жатыр, болашақта керемет демалыс орындарының біріне айналады», - дейді велосипедті жалға беруші Ербол.
2 метрлік велотрассаның екі жағы самсап өскен қайың, үйеңкі тағы да басқа түрлі ағаштар бүкіл жолды қамтиды. Жол бойында демалатын орындар мен қоқыс тастайтын жәшіктер орнатылған. Бұл - табиғат аясында пайдалы демалудың тапсырмас орны.
