Соңғы онжылдықта көне шаһардың келбеті сан алуан күйге енді. Алайда тереңнен тамыр тартқан тарихи болмысын жоғалтқан емес. Енді өңір тізгінін Бердібек Сапарбаев қолға алғалы облыс орталығындағы көпқабатты үйлердің қасбетіне айрықша көңіл бөлініп, жаңаша жаңғыруда.
Бүгінде Тараз қаласында «Тұрғын үй жөндеу – Тараз» жауапкершілігі шектеулі серіктестігі ауқымды жұмыстар жүргізуде. Серіктестік көпқабатты үйлердің қасбеттеріне тарихи тұлғалар мен орындардың суреттерін салдырып, тұрғындардың таңданысын тудыруда.
– Облыс әкімі Бердібек Сапарбаевтың тапсырмасымен облыс орталығындағы Төле би, Абай, Жамбыл, Тәуке хан даңғылдарының бойындағы 35 тұрғын үйдің сыртына безендіру жұмыстарын жүргізіп жатырмыз. Бастапқыда 41 үйді әрлеу жоспарланса, қазір 6 үйдің қасбеті безендірілмейтін болып шешілді.
Дәл қазір 18 үйді әрлеу жұмыстарын аяқтадық. Жоба толығымен Тараз қаласындағы тұрғын үйлерді жаңғырту жұмыстарына жауапты мердігер компаниялардың демеушілігімен жүзеге асуда, – дейді «Тұрғын үй жөндеу – Тараз» жауапкершілігі шектеулі серіктестігінің директоры Самат Мырзалиев.
Ал көпшіліктен оң бағасын алып жатқан муралдарды жас суретші Айтан Елебаев салып жатыр. Ол – Темірбек Жүргенов атындағы Қазақ Ұлттық өнер академиясының түлегі.
– Бұл менің алғашқы жобам емес. Бұған дейін Түркістан теміржол бекеті маңындағы ғимараттардың сәулеттік келбетіне өзімнің қолтаңбамды қалдырғанмын. Ал Тараз қаласындағы үйлердің сыртына мурал салу бойынша конкурсқа қатысып, жеңімпаз атандым. Осылайша, қазір «Астана» ықшамауданындағы 4 үйдің сыртына Нұр-Сұлтан қаласындағы сәулетті нысандардың бейнесін бейнелеуге тапсырыс алдым. Туындыларым көпшіліктің көңілінен шығып, өткен-кеткендер алғысын айтуда. Алдағы уақытта енді қаладағы басты даңғылдардар бойындағы көпқабатты үйдердің сыртына Абай және әл-Фараби сынды тұлғалардың бейнесін бейнелейтін боламын, – дейді талантты жас суретші.
Осылайша, көне Тараз шаһары жаңаша кейіпке еніп жатыр. Қазірдің өзінде көзге таңсық көрінген дүниеге біреулер таңырқай қараса, екіншілер дән риза болуда. Бұл да болса Сапарбаевтың артынан қалар бір құнды дүние болары хақ. Одан бөлек, мұны тарихи тұлғаларға көрсетілген құрмет пен кейінгі ұрпақты ұлыларды ұлықтауға бастаған тәрбие құралы деп бағалаған жөн.
Саятхан САТЫЛҒАН,
Жамбыл облысы
