Осындай сынақты шақта алдан шығар қиындыққа бірлесе қарсы тұруға шақырған Елбасының үндеуіне бірінші болып үн қосқандар қатарында еріктілер болды.
Жетісулық еріктілер де осы шараға атсалысқан жерлестерінің бірінші легінен көрініп, көптеген қайырымдылық іске ұйытқы бола білді. Қазіргі кезде де алдыңғы қатарда келеді. Күні кеше жетісулық еріктілер Елбасы Нұрсұлтан Назарбаевтың алғысхатымен марапатталды. Елге үлгі көрсетіп, жақсы істерге жол салған екпінді еріктілерге алғысхатты облыс әкімінің бірінші орынбасары Лаззат Тұрлашов пен «Nur Otan» партиясы облыстық филиалы төрағасының бірінші орынбасары Жанболат Жөргенбаев тапсырды.
Жетісулық еріктілер ел аумағында жарияланған төтенше жағдай мен карантин кезінде жалпақ жұрттың жан-жақты қолдауын иеленген BizBirgеmiz республикалық акциясы аясында көпбалалы, аз қамтылған отбасылар мен тағы да басқа мұқтаж жандарға көмек көрсетті. Оларды қажетті азық-түлікпен қатар антисептикалық құралдармен, тұрмыстық керек-жарақтармен де қамтамасыз етіп келеді.
– Әлемге қауіп төндірген қатерлі індетпен күрес әлі жүріп жатыр. Елбасы Нұрсұлтан Назарбаев, Мемлекет басшысы Қасым-Жомарт Тоқаевтың бастамасымен қатерлі дерттен халықты аман алып қалуға бағытталған жұмыстар дер кезінде қолға алынды. Көрінбейтін майданда сіздердің де көмектеріңіз көп болғанын, әлі де жалғасып жатқанын айта кеткен жөн. Нағыз қиын жерлерде дәрігерлермен, тәртіп сақшыларымен бірге сіздер жүрдіңіздер. Біздің болашағымыз өздерің сияқты жалынды жастардың жігері мен жанашырлығына байланысты. Сондықтан үлкен рақмет айтамын, марапаттарыңыз құтты болсын! – деген Лаззат Махатұлы өз сөзіне еріктілер тарапынан жүзеге асып жатқан істерді өзек етті, жастарға шын жүректен ризашылығын білдірді.
Елбасының алғысхатын алғандардың бірі – 2016 жылдан бері еріктілер сапында жүрген «Мейірімді Жетісу» фронт-кеңсесінің төрағасы Ержан Дәулетбаев.
– Біздің еріктілер қайырымдылық, тазалық сынды акцияның барлығына қатысып, демеушілер мен кәсіпкерлердің қолдауымен мұқтаж жандарға тұрақты көмек көрсетіп келеді. Елбасының елеп беріп отырған марапаты жұмысымызға деген жігерімізді одан ары жани түсері сөзсіз, – дейді ол.
Биылғы жылдың 19 наурыз бен 17 маусымы аралығында партияның аймақтық және аумақтық филиалдары, «Жас Отан» жастар қанаты мен еріктілер «Бақытты отбасы», «Ардагерлерді ардақтайық» және «Кедергісіз келешек» жобалары аясында 24 440 адамға 253 млн 900 мың теңге көлемінде түрлі азық-түлік пен жеке гигиена заттары, антисептикалық құралдар, медициналық бетперделер сатып алыныпты. Облыс еріктілері Мақтаарал ауданына барып, су тасқынынан зардап шеккендерге де қолдан келгенше көмек көрсетті. «Біз біргеміз» акциясының жұмысы одан әрі жалғаса бермек.
Болат АБАҒАН,
Алматы облысы
