Мәжілістегі «Nur Otan» партиясы фракциясының кеңейтілген отырысында Қазақстан Үкіметі партияның сайлауалды бағдарламасын жүзеге асыру туралы есеп берді.
Фракция басшысының бірінші орынбасары Гүлмира Исимбаева «Nur Otan» партиясының Көшбасшысы Нұрсұлтан Назарбаев өткен жылы тамызда партияның саяси кеңесінің кеңейтілген отырысында сайлау алдындағы барлық міндеттемелерді орындауға қатаң бақылау орнатуды тапсырғанын айтты.
«Депутаттық корпус пен Үкіметтің бірлескен жұмысы «Nur Otan» партиясының сайлауалды бағдарламасының қажетті заңнамалық негізін қалыптастырып, партияның сайлау алдындағы барлық міндеттемелерін орындауға мүмкіндік берді. Бағдарламаны жүзеге асыру барысына апта сайын мониторинг жүргізіліп отырды. Қажетті заңнамалық негіз құру қазіргі уақытта партияның барлық сайлау алдындағы міндеттемелерінің 90% - ын орындауға мүмкіндік берді. Бұған Елбасы саясаты арқасында қалыптасқан төзімділік ықпал етті. Осының бәрі елімізді тұрақты дамытуға және қазақстандықтардың өмір сүру сапасын жақтартуға мүмкіндік берді", - деді Гүлмира Исимбаева.
Үкімет мүшелері атап көрсеткендей, «Nur Otan» партиясының 2016-2020 жылдарға арналған сайлауалды бағдарламасын жүзеге асыру аясында елімізде экономикалық қайта құру жүргізілді. Бұл экономикаға мемлекеттің қатысу үлесін 18,3%-дан 16,2 %-ға төмендетуге мүмкіндік берді. ШОБ-тың ЖІӨ-дегі үлесі 25%-дан 30%-ға ұлғайтылды. «Doing Business» рейтингінде бизнесті жүргізу жеңілдігі бойынша Қазақстан 25 орынға жайғасты.
Бұдан басқа ірі инфрақұрылымдық жобалар іске асырылды, 2,8 мың км жол салынды және қайта жөнделді, 2,5 млн. шаршы метр үй салынды, 434 мың жұмыс орын құрылды.
Басқа да салаларда айтарлықтай көрсеткішке қол жеткізілді. Мысалы, 417 жаңа мектеп және 3,1 мың балабақша салынды. Міндетті әлеуметтік медициналық сақтандыру жүйесі енгізілді. Жаңа технологияны пайдаланудың арқасында мемқызметті автоматтандыру 80%-ға жеткізілді және тағы басқа.
