Міне:
Шырылдауық шегіртке Ыршып жүріп ән салған.Көгалды қуып гөлайттап,Қызықпен жүріп жазды алған.Жаздыгүнгі жапырақтыңБірінде тамақ, бірінде үй,Жапырақ кетті, жаз кетті,Күз болған соң кетті күй.Жылы жаз жоқ, тамақ жоқ,Өкінгеннен не пайда?Суыққа тоңған, қарны ашқанОйын қайда, ән қайда?
Осылай, шырылдауық шегірткені бәріміз жек көріп кеттік. Сол шегіртке кәсіпкер Нұрсила Ахметбектің түсіне тегін кірді. Шәй ішіп отырған еді, пырылдап ұшып келіп, тізесіне қонды. Сосын былай деді:
– Нұрсила Ахметбек мырза сіз боласыз ба? – деп сұрады шегіртке. Нұрекең оған бір түрлі қарады. Сөйлеп кеткеніне таңданысын білдіргісі келмей, шәйінен бір ұрттады да, асықпай жұтып, көзін жұмды. Сосын көздерін асықпай ашып, шегірткеге бажырая қарады да, тістене сөйледі:
– Ал, өзің кімсің?
– Шегіртке апайыңмын.
– Қалай, менен үлкенсің бе?
– Ия. Бізде бір сағатымыз бес жылға есептеледі.
– Кәрі қақпас екенсіз ғой?
– Сіз бізді олай мазақтамаңыз! Бізді әншілерге теңедіңіз! Не жаздық біз сізге?
– Осыны айтуға келдіңіз бе?
– Ия. Далада бір миллион шегіртке тұр. Сап түзеп. Үйіңізге басып кірсек, қайда қашарыңызды білмей қаласыз!
Нұрекең қарқылдай күлді. Шегірткеден қорқып та тұрған жоқ, оның қыр көрсетуі күлкісін келтірді. Қазір ғой, шапалақпен тізесіне салып қалса, мыжылады да қалады.
– Шегіртке ханым, мен шырылдап жүріп ала жаздай ән салған, фонограммамен халықты алдаған әншілерді сіздерге теңедім. Онда тұрған не бар? Мен олардың түр-түсін шегірткеге ұқсатып, құйрығың бар, қанатың бар, тұмсығың бар деп жатқан жоқпын ғой. Мен тек сіздердің әрекеттеріңізге, жалқаулықтарыңызға, адал іс атқармайтындықтарыңызға теңедім. Ия, ия, әншілерді солай ұқсаттым.
– Аа, бізді адамдарға ұқсатты ма деп қалсақ. Біз кейбір арамтамақ адамдарға ұқсағымыз келмейді. Қазір заман өзгерді, бекерге ала жаздай «гөләйттамаймыз», егістіктерге қаптап, дән жейміз, жапырақ жейміз, сол үшін бізді улап та жатасыздар. Адамгершіліктеріңіз нөл екен ғой? Қалай өмір сүреміз енді? Дегенмен, сізге рахмет, бізді елеп, әншілерге теңедіңіз.Сау болыңыз!
– Пәкә, пәкә...
Ол қолын бұлғап жатып, оянып кетті. Негізі кәсіпкер Нұрсила Ахметбектің телебағдарламаның бірінде әншілерді шегірткеге теңегені рас. Әншілер де өре түрегеліп, оны сотқа беретінін мәлімдеген. Ал, оны әлеуметтік желіде «Жарайсыз Нұрсила! Дұрыс айттыңыз!» деп қоштағандар да, «Мұнысы несі? Әншілердің бәрі шегіртке емес қой?» деп сабырға тоқтағандар да, «Әй, мұныңыз не?» деп оқты көзін оқтағандар да болды. Сіз не дейсіз, қадірлі оқырман? Мына коллажға Нұрекең өкпелей қоймас, өзінің «сүйікті» шегірткесі ғой?
