Денсаулық министрі дабыл қағып, терапиямен қамтамасыз ететінін айтты. Дәріханадағы ұзын-сонар кезекті көргенде-ақ халықтың халі мүшкіл екенін ұғасыз. Ал Алматы қалалық Қоғамдық денсаулық сақтау басқармасы басшысы Камалжан Надыров медицина қызметкерлерінің жетіспейтінін хабарлады. Демек, қосымша шара қолданып, алдын алмаса, Италияның күйін кешуіміз мүмкін. Бұған дәрігерлер мен медицина факультеті студенттері не дейді?
Алматының бас дәрігері кіші жұқпалы және провизорлық стационарларда жұмыс істеу үшін дәрігерлер, орта және кіші медицина қызметкерлері, зертханалардағы жұмысқа арнайы мамандар мен волонтерлер қажет екенін айтты. Бұл туралы Қоғамдық денсаулық сақтау басқармасының басшысы Facebook парақшасында жазды.
«Бүгінде медициналық қызметкерлердің санын арттыру, кадрлық құрамды көбейту мәселелері бірінші орында тұр. Қазіргі уақытта дәрігерлерге, провизорлы және жұқпалы аурулар ауруханасында қызмет істейтін орта және кіші медициналық қызметкерлерге, зертхана мамандары мен еріктілерге зәру болып отырмыз. Барша ақ халатты абзал жандарды пандемияны жеңіп шығуға атсалысуға, індетке қарсы тұруға шақырамыз» деп жазды Камалжан Надыров Facebook парақшасында.
Бұдан бұрын ол қаладағы провизорлық төсек-орындар 90%-ға, инфекциялық төсек-орындар 95%-ға толып кеткенін айтқан. Бұл мәселені шешу үшін қосымша 3 700 орын ашылмақ. Атап айтқанда, «Халық арена» базасында 800 орын, теміржол ауруханасы госпиталі базасында 150 орын әзірлеу жоспарланып жатыр. Науқас саны тым көп болса, 10 мың көрерменге арналған «Алматы аренаны» емдеу орнына айналдыруы мүмкін.
Төсек-орын, емдейтін жер табылар. Дәрігер жетіспеушілігін қалай шешеміз? Жұрт қазір сатып алған укол-системасын салып беретін маман таппай жүр. Стадиондарды емдеу орталығына айналдырар болсақ, медицина қызметкерлері мәселесін бірінші кезекте шешуіміз қажет сыңайлы. Осындайда көбі медицина факультетінде оқитын 6-7-курс студенттерін жұмысқа шақыру жағын айтады. Коронавируспен күресіп жүрген дәрігерлер мұндай ұсынысқа қалай қарар екен.
«Медициналық университет студенттері жұмысқа шығуына болады. Оларға толық айлық төленеді. Министрліктің өзі рұқсат беріп отыр. Бұрындары хирург болып жұмыс істеген болсын, мамандығына қарамай бәрін жұмысқа тарту көзделген. Бәріміз коронавируспен күреске жұдырықтай болып жұмылуымыз қажет. Бірақ студенттердің жұмысқа келуі басталған жоқ. Көбі жазғы демалыста жүр. Мәселен, бір қыз бізге жұмысқа келмекші болды. Өкінішке қарай, өзі ауырып қалды», – дейді елордадағы теміржол аруханасының дәрігері Ғабит Нұрханұлы.
Осы орайда, індетпен күрестің бел ортасында жүрген бірнеше студентпен сұхбаттастық. Соның
бірі – Шалқар Аятұлы. Ол – Қарағанды медицина университетінің 4-курс студенті. Облыстық балалар клиникалық ауруханасында санитар болған Шалқар Құрмет екі апта провизорда жұмыс істеген.
Оның айтуынша, қазір пневмониямен ауырып жатқандар көп. Әрі негізгі проблема – дәріханада дәрі-дәрмектің жоғы. «Көбі өз үйінен емделіп жатыр. Осыдан бір-екі бұрын туысым пневмониямен ауырып, жедел жәрдеммен ауруханаға бардық. КТ түсіру керек болды. Сол кездегі кезекті көрсеңіз. Түнгі 12-де барып, таңғы 7-ге дейін кезекте тұрдық. Ауырып жатқан адамдар, үлкен кісілер өте көп», – дейді ол.
Шалқар Аятұлы шамасы келсе, тағы да жұмыс істеуге дайын. Мұны студентке берілген мүмкіндік деп отыр. Жұқтырып алу қаупі зор, мұны ешкім жоққа шығара алмайтынын айтады. Бірақ барлық шараны сақтай білсе, бұл студент үшін тәжірибе мен таным екенін атап өтті.
Иә, қарап тұрсақ, студенттердің құлшынысы жаман емес. Келер қауіп пен қазіргі жағдайды түсініп отыр. Жоғарыда Камалжан Надыровтың волонтер мәселесін қозғағанын да білеміз. Ол негізінен, волонтерлерді Call-орталық жұмысына міндеттеу қажетін айтты. Президенттің іс басқармасы медициналық орталық клиникалық ауруханасы нейрохирургия бөлімінің меңгерушісі Мыңжылқы Сайлауұлы да осыған қатысты пікірін білдірді.
Оның айтуынша, стадиондар провизорлық орталыққа айналса, волонтерлердің көмегі керек.
«Волонтерлерді тартар болсақ, тамақ пен жатын орын жағдайын шешу керек. Медицина факультетіндегі 6-7-курс студенттеріне ақша төлеп, көмекке шақыруға болады. Ең дұрыс шешім – жеке клиникаларға ақша төлеп, жұмысқа тарту», – дейді Мыңжылқы Сайлауұлы.
Ал студенттердің арасында волонтер-медик болып, халыққа көмек көрсетіп жүргендер бар. Соның бірі – Жәнібек Солтанай. С.Асфендияров атындағы ҚазМУ-дың 6-курс студенті қатарластарының жұмыс істеуге құлшынысы барын жеткізді.
«Медицина факультетінде оқитын 6-7-курс студенттері онсыз да жұмыс істейді. Сабақтан тыс уақытта жедел жәрдемде, лабораторияда жүреді. Өзім карантиндік аймақта волонтер-медик болып қызмет істеймін. Өзім үшін жұмыс істеп жатырмын. 12 жылдан бері волонтермін. Өзімнің жүрек қалауыммен жүрмін. Оқшаулануға жатын орын сұраған жоқпын. Отбасымда анам екеуміз ғана тұрамыз. Сондықтан үйде оқшауланамын. Жұмыс кезінде тамақпен, қорғаныс заттарымен қамтамасыз етеді», – дейді ол.
Демек, медицина факультеті студенттері жағдайын жасар болса, көмек қолын созуға қарсы емес. Әрі бұл келешек ақ халатты маманға үлкен тәжірибе болмақ. Егер стадиондарды емдеу орындарына айналдыру қажет болса, жас маманмен қатар студенттің де үлесі қажет. Зейнеттегі, декреттік демалыстағы, шетелде жүрген дәрігерлер де жұмысқа тартылса құба-құп. Бастысы, дәріханада дәрі тапшы кезде халыққа жәрдем берер дәрігер таппай қалмайық. Өйткені дертіне шипа іздегендердің дәріхана кезегінде тұрып-ақ жүйкесі жұқарды.
АЙЗАТ АЙДАРҚЫЗЫ
