Алматыда коронавирусқа қатысты күнделікті өсім 1,1%, оның ішінде сырқаттанғандардың негізгі бөлігі жұмысқа қабілетті тұрғындар. Бұл туралы бүгін Алматы қаласының әкімі Бақытжан Сағынтаев Қазақстан Президенті жанындағы Орталық коммуникациялар қызметі алаңында өткен онлайн брифингте айтты.
Оның айтуынша, Мемлекет басшысының тапсырмасына орай елімізде енгізілген екі апталық шектеуге байланысты екі күннен бері жұмыс жүргізіліп жатыр. Мемлекеттік комиссияның шешіміне сәйкес, бірқатар кәсіпорын жұмысын тоқтатты.
«Оның дені шағын және орта бизнеске байланысты. Жалпы, 680 мыңға жуық жұмыс орнының қызметі тоқтатылды», - дейді қала басшысы. Сонымен қатар, ол қаладағы эпидемиологиялық ахуалға тоқталды. «Эпидемиологиялық жағдайға келер болсақ, жағдай бақылауда, бірақ күрделі. Жалпы, өңірде 6 202 вирус жұқтыру жағдайы тіркелген. Күнделікті өсім 1,1%, оның ішінде сырқаттанғандардың негізгі бөлігі жұмысқа қабілетті тұрғындар (82%). Індеттен 2 485 адам жазылып шықса, 26 адам көз жұмған. 6 шілдеде анықталған науқастар саны – 113, реанимацияда 64 науқас жатыр. Аурудың ауырлық дәрежесіне назар салар болсақ, жағдайы аса ауыр науқастар саны - 24, осындай науқастар саны арта түсуде. 1 264 науқастың жағдайы орташа ауыр және 135 науқастың жағдайы қанағаттанарлық деңгейде», - деді Бақытжан Сағынтаев.
