Еңбек және халықты әлеуметтік қорғау министрі Біржан Нұрымбетов 42500 теңге жәрдемақы туралы Аружан Саинның ұсынысына қатысты пікірін айтты.
Бала құқықтары жөніндегі уәкіл Аружан Саин 42500 теңгенің көпбалалы отбасына жетпейтінін айтып, жәрдемақыны бала санына қарай беруді айтқан болатын.
«42 500 теңге – еліміздегі жалғыз әлеуметтік төлем емес. Бізде бюджеттен 39 әлеуметтік төлем, ай сайын шамамен 300 млрд теңге төленеді. Оның ішінде 8 жәрдемақы мен 3 төлем – көпбалалы отбасыларға қолдауға жұмсалады. Бала туғанда берілетін төлем, бала күтімі және биыл бала санына қарай тағайындалатын жаңа мемлекеттік әлеуметтік жәрдемақы енгіздік. Бүгінде 1 млн 700 мыңнан астам бала тәрбиелеп отырған 390 мың көпбалалы отбасы осы жәрдемақыны алып отыр», - деп атап өтті министр Орталық коммуникациялар қызметінде.
Сонымен бірге, министр табысы төмен отбасылардың адам санына қарай тағайындалатын атаулы әлеуметтік көмек алатынын еске салды.
«Қазіргі уақытта 128 мың отбасы немесе 660 мың адам атаулы әлеуметтік көмек алады, оның ішінде 442 мың бала бар. Олар да мемлекеттің кепілдендірілген әлеуметтік пакетін алады. Сондықтан, балалы отбасыларға әлеуметтік төлем саясаты жүзеге асырылып келеді. Және балаларға қатысты төлемдер өткен жылмен салыстырғанда 1,5 есе артты. Өткен жылы бұл шығындар 372 млрд теңге болса, биыл – 581,5 млрд теңге бөлінді. Дегенмен, әр төлемнің негіздемесі болатынын түсіну керек. 42 500 теңге – мемлекеттің жұмыс істейтін азаматтарға деген аз да болса көмегі. Егер бір отбасында бірнеше адам жұмыс істесе, тиісінше әрқайсысына 42 500 теңгеден беріледі», - деді Біржан Нұрымбетов.
