Түркістан облыстық Қоғамдық денсаулық сақтау басқармасының ғимаратында осы жобалардың ресми түрде тұсауы кесілді. Қоғамдық денсаулық басқармасына Түркиядан келген екі жасанды тыныс алу аппараты ұсынылса, 20-дан астам дертке шалдыққан мұқтаж отбасыларға дәрі-дәрмек үлестірілді. Одан бөлек, аппаратты жеткізуге атсалысқан Қазақстанның Түркиядағы елшілігі мен елші Абзал Сапарбекұлына алғыс айтылды.
«Өмір» жобасының мақсаты – қазір елімізде тапшы болып отырған оттегі аппаратын шетелден өңіріміздегі емханаларға жеткізу. Ал «Шипа» жобасы арқылы орта деңгейдегі дәрі-дәрмектер қорапшасын дайындап, оны ауыл-аудандағы әлеуметтік жағдайы төмен және аз қамтылған көпбалалы отбасыларға таратылады. Осы жобаларды жүзеге асыру үшін ел жанашырлары, облыстық мәслихаттағы «Nur Otan» партиясының фракция өкілдері мен өзге де азаматтар қолдау көрсетті. Қазірдің өзінде қорға 10 миллион теңгеден астам қаржы жиналған. Бұл қаржының бір бөлігіне Түркия және Қытай елдерінен 50 жасанды тыныс алу аппаратына тапсырыс беріліп, олар алдағы аптада өңірге жеткізілмек. Сонымен қатар әзірге 300 дәрі-дәрмек қорапшасын елге үлестіру көзделген. Әрбір дәрі қорапшасының құны 14-15 мың теңге көлемінде. Қорапша ішінде Түркістан облысы Қоғамдық денсаулық сақтау басқармасы тарапынан ұсынылған, қазір белең алып отырған коронавирус пен пневмония сырқаттарының алдын алуға, емделуге арналған дәрілер мен құралдар болмақ.
Алғашқы екі жасанды тыныс алу аппаратын алуға демеушілік көрсеткен «Nur Otan» партиясының Түркістан облыстық филиалы төрағасының бірінші орынбасары Бейсенбай Тәжібаев бұл жобалар өңірдегі жас еріктілерді игі іске жұмылдырып отырғанын жеткізді.
– Қазір елімізде коронавирус індеті кең таралып, ел қиналып жатыр. Науқастар саны да артқан. Түркістан облысында COVID-19 анықталған науқастар саны 2 391-ге жетті. Өкінішке қарай, жасанды тыныс алу аппараттары мен дәрі-дәрмек жетіспеушілігі байқалып отыр. Сондықтан партия бастамасымен өңірдің белсенді жастарынан құралған Jas Turkistan еріктілер қозғалысы құрылып, осы жобаларды бастап кетті. Бұл жоба облыстық Қоғамдық денсаулық сақтау басқармасымен бірлесіп атқарылады. Бұл игі бастамаға партия өкілдері, мәслихат депутаттары қолдау көрсетіп жатыр. Пандемиямен күресте, мұқтаж отбасыларға көмектесуде аталған жобалар тиімділігін көрсетеді деп сенемін. Осы қиын кезеңде елге көмектесуге барша азаматтарды атсалысуға шақырамыз, – деді ол.
Жалпы, бұл жобаға қазір облыстық мәслихат депутаттары – Нұралы Әбіш (5 млн теңге), Алмас Салимов (1 млн теңге), Жаңабай Ағабеков (1 млн теңге), Мағауия Тұрысбеков (875 мың теңге), Қайнар Аббасов (767 мың теңге), Баймахан Сүлейменов (200 мың теңге) қаржы аударды. Сонымен бірге Жазира Ыдырысова (1 млн 50 мың теңге) мен Инара Намазбаева (400 мың теңге) сынды ел жанашырлары да ақшалай қолдау көрсетіп отыр.
Өңірдегі волонтер жастар ауруханалардағы науқастарға саумал мен қымыз және азық-түлік жеткізуді қолға алды. Түркістан облыстық «Жастар ресурстық орталығының» директоры Амалбек Өміртай мен «Jas Otan» Жастар қанатының Түркістан облыстық филиалының төрағасы Жансерік Жұман жобаларды жүзеге асыруға ауыл-аймақтағы жастар да үлес қосатынына сенім білдіріп, сауапты іс тұтас облысты қамтитынын жеткізіп отыр.
