Бәйдібек аудандық полиция бөлімінің қызметкерлері есірткі заттарын сақтау жайын анықтап, жергілікті тұрғынның үйінен табылған қарасора егістігін жойды.
Жедел-іздестіру іс-шара барысында полиция қызметкерлері Бәйдібек ауданының тұрғынын ұстады. Оның сөмкесінен өсімдік тектес есірткі заты бар пакет табылған.
Сонымен қатар жедел уәкілдер күдіктінің үйін тінту кезінде, оның бақшасынан қарасораға ұқсас төрт түп есірткі затын тапты. Полиция қызметкерлері айғақты зат ретінде алынған есірткілерді сараптамаға жіберді. Сараптама қорытындысына сәйкес, олар жалпы салмағы 550 грамнан асатын «кептірілген марихуана» және «қарасора» түптері болып шықты.
Аталған жайт Бәйдібек аудандық ПБ-не Қылмыстық кодекстің екі бабы: 296-бап «Өткізу мақсатынсыз есірткі құралдарын, психотроптық заттарды, олардың аналогтарын заңсыз қолдану» және 300-бап «Құрамында есірткі заттары бар өсіруге тыйым салынған өсімдіктерді заңсыз өсіру» бойынша тіркелді. Сотқа дейінгі тергеу амалдары жүріп жатыр.
