Праймериз – жастарға берілген мүмкіндік
«Nur Otan» партиясы жақтастарының zoom-конференциясында Ш. Кұдайбердіұлы атындағы мектеп директоры, тарих ғылымдарының кандидаты Әділ Сайлаубек «Nur Otan» партиясының праймеризі елімізде эволюциялық өзгерістер жасауға бағыт-бағдар бола алуы керек деген пікірін білдірді. Оның айтуынша, елдің әлеуметтік-экономикалық өмірін жақсарту үшін жастардың қоғам өміріне ықпалын арттыру өте маңызды. Себебі білімді, бірнеше шет тілін меңгерген жастардың әлеуетін әлі де толық пайдалана алмай отырмыз. «Жергілікті жерлерде жастардың үлесі аз. Шығыс Қазақстан облысы бойынша зерттеу жүргізіп, жастардың қоғамды дамытуға үлес қосуға ықпалын анықтадық. Байқағанымыз, аймақта әлі де жасы келген шенеуніктер жастарға мүмкіндік бермейді. Әкімдер әлеуметтік желіде істеген жұмысын жарнамалаймын деп, керісінше халықтан алыстап кеткендей көрінеді. Олардың қағаз жүзіндегі есеп-қисабы іс жүзінде орындалғанына ел күмәнмен қарайды. Дұрысында, сенбейді», – деді ол. Содан кейін айрықша назар аударатын мәселе – жергілікті жерде әкімқаралар халыққа адал қызмет ететін азаматтардың алдын орап кетеді. «Біз осы мәселенің мәнісін түбегейлі зерттегеніміз жөн. Бұл мәселе, әсіресе аймақтарда өте өзекті. Идеясын айтып, жаңа жобаны іске асырамын деген жастарды уақыт өте мүлдем таппай қаламыз. Себебі халық үшін қызмет етемін дейтін жастардың тауы шағылып, қасаң қағидамен жүретін жүйеден көңілі қалған. Сондықтан тәуелсіз ойлайтын жастардың пікірімен санасып, озық идеяларды қоғамда пайдалана білуіміз керек деп ойлаймын», – деді Әділ Сайлаубек.Кез келген мәселе ашық талқыланып, шешімін табуы тиіс
«Nur Otan» партиясы жақтастарының zoom-конференциясында Uzym.kz сайтының бас редакторы, Nur.kz сайтының журналисі, блогер, медиа-волонтер Әлия Әбсеметова мемлекет саясатын нәтижелі жүзеге асыруда қоғамның барлық мүшесі белсенді атсалысуы қажет деген ойымен бөлісті. «Ең бірінші халықпен тікелей байланыс орнатуды жүйелеген жөн. Кері байланыс орнатудың маңызы зор. Себебі қазір ел ішінде жергілікті халық проблемасын әлеуметтік желі арқылы жеткізеді. Жанайқайына жаппай халық назар аударса ғана шешілетініне көзі жетіп отыр. Жергілікті шенеуніктерге арыз-шағымын айтып барса, шенеуніктер қарапайым тұрғындардың проблемасына салғырт қарайды. Әр ауыл, аймақтың проблемалары қордаланып, уақытылы шешімін таппаған соң жиналып қоғамда дау-дамай тудырады. Жергілікті шенеуніктердің салғырттығы, ауыл тұрғындарының проблемасына немқұрайды қарауы халықты ашу-ызасын келтіреді. Сондықтан елдің айтарын тыңдап қана қоймай, оның проблемасын шешуде кері байланыстың жолдарын жетілдіру керек. Белгілі бір мәселенің шешімін тапқанына ел соңына дейін көз жеткізбесе, сенбейді», – деді Әлия Әбсеметова. Оның айтуына қарағанда, партияның праймеризі туралы Жетісу жастары әлеуметтік желіден біліп, хабардар болып жатыр. Қоғамдағы кез келген проблемаға бейжай қарауға болмайды. Әрбір мәселе дер уақытында, уәде берген кезінде шешілсе, елдің жергілікті билікке деген сенімі артады. Сол үшін еліміздегі саяси, әлеуметтік, экономикалық өзгерістерге әрбір азамат өз пікірін айтып, үлесін қосуы керек. «Алдағы уақытта өтетін «Nur Otan» партиясының праймеризі халықтың тұрмысын түзейтін қозғаушы күшке айналса, біз мақсатқа бірге жетеміз. Қыруар қаржы бөлініп, жүзеге аспай қалған жобаларды сыннан қорытынды шығарып, соңына дейін жеткізуге атсалысайық. Елдің тұрмысы түзелсе, әлеуетіміз артады. Экономиканың дамуына оң ықпал етеді. Халық үшін адал қызмет ететін жастарға мүмкіндік берейік» деп ойын қорытындылады Әлия Әбсеметова.Халыққа сөзі өтетін жастар праймеризге қатысуы керек
Ал zoom-конференцияға Алматы облысы Талдықорған қаласынан қатысқан блогер Дана Ерікқызы праймеризге елмен етене жақын жұмыс істей алатын, халық алдында беделді азаматтардың қатысқаны жөн деген пікірін білдірді. «Әрбір сөзін халыққа анық, ашық айтып, проблеманы жергілікті жерде: ауыл, аудан, қала, облыс деңгейінде шеше білетін әкімқаралар көп болуы тиіс. Қазір ел проблемасын әлеуметтік желі арқылы айтқанды жөн көреді. Себебі жергілікті басқарушы органдардың жұмысына ел сенбейді. Жұмысы көңіл көншітпейді. Аудан, қала, ауыл аймақта шешімін таппаған мәселе әлеуметтік желі арқылы басшыларға тез жетеді. Өйткені аймақтарда әкімнің қабылдауына барған адам оған проблемасын айтып, есігінен кіре алмайды. Сондықтан жергілікті шенеуніктер халықтың сенімінен шығуы үшін әлеуметтік желінің де жұмысын жан-жақты меңгеруі тиіс. Праймеризге қатысып, елдің мұң-мұқтажын билікке жеткізуге тырысамын», – дейді блогер.Аймақтарда халықпен тікелей жұмыс істейтін мемлекеттік мекемелердің жұмысын жандандыру қажет
«Nur Otan» партиясы жақтастарының zoom-конференциясында Жансүгіров атындағы Жетісу мемлекеттік университетінің Гуманитариялық факультетінің деканы, тарих ғылымдарының кандидаты Амангелді Төлемісов елімізде жүзеге асуы тиіс жобалар мен билік тарапынан берілген тапсырмалардың дер кезінде жүйелі орындалмай жататын себептеріне тоқталды. Амангелді Төлемісовтің айтуынша, халықпен тікелей жұмыс істейтін мемлекеттік мекемелердің жұмысын жүйелеп, реттеу керек. «Сол кезде ғана әлеуметтік, экономикалық проблемалар өздігінен, рет-ретімен шешіледі. Қазіргі уақытта «билік пен атқарушы органдар қайтсе халықтың сенімінен шығады» деген мәселені шешу жолдарын жан-жақты қарастырған абзал. «Nur Otan» партиясы халықтың партиясына айналуы тиіс», – деді А.Төлемісов. Амангелді Төлемісовтің ойынша, аймақтардағы халықпен етене жақын жұмыс істейтін мемлекеттік органдардың қызметі бәсекеге қабілетті болуы өте маңызды. Ол үшін жастарға мүмкіндік көп. Праймеризде қоғамда қатып қалған сеңді бұза алатын, тың идеяларымен елдің әлеуметтік жағдайын жақсартуға жол бастайтын жастарға орын беруіміз керек. «Ұлтқа қызмет ету – білімнен емес, мінезден» деп Әлихан Бөкейхан текке айтқан жоқ. Жемқорлық жайлаған қоғамда өсіп, оқыған жастар қазір де сол жүйенің нақ ортасында жүр. Күрмеуі қиын мәселені шешуге жемқорлық кедергісін келтіреді. Азат ойлы жастардың аяғына тұсау салады. Сондықтан азат ойлы жастарға праймеризде мүмкіндік берген дұрыс. Елдің ертеңі – жастарға сенім артамыз. Ал жасы келген тәжірибелі мамандар жастарға жол көрсетіп, келешек ұрпаққа жөн сілтеуі тиіс.Майра ЖАНЫСБАЙ