Атырауда «Атырау» ӘКК және дистрибьютор 40 аталымды дәрі-дәрмектің тұрақтандыру қорын құру туралы келісімге қол қойды. Сондай-ақ «СҚ Фармация»-дан дәрілік заттар апта сайын үздіксіз жеткізілетін болады.
– Атырау облысының әкімдігі және «Атырау» ӘКК-мен бірлесіп тұрақтандыру қоры құрылды. Осы мақсатта жыл соңына дейін 4 миллион 800 мың қаптама болатын дәрілік зат пен медициналық бұйым сатып алуға 500 миллион теңге бөлінді. Оның тоғыз жүз мың қаптамасы төмендетілмейтін қалдықты құрайды. Бүгінгі таңда өңірдегі қоймаларға 240 миллион теңгеге 688 мың дана қаптама жеткізілді. Алғашқы жеткізілім жүк тасымалдау үшін ұшақпен қамтамасыз еткен «ТШО» компаниясымен бірлесіп жүзеге асырылды. Оның 50 миллион теңгелік дәрі-дәрмегі мен медициналық өнімі облыстың Индер, Құлсары аудандарына жіберіліп, ендігі кезекте жүк Құрманғазы ауданына да жөнелтілмек. Ал қалған аудандар дәрі-дәрмекпен жақын арада қамтамасыз етілетін болады, – деді «Атырау» ӘКК» АҚ басқарма төрағасының бірінші орынбасары Данияр Таханов.
Аймаққа жеткізілген дәрі-дәрмектердің қоры Атырау облысы әкімінің назарында тұр. Өткен апта соңында аймақ басшысы Махамбет Досмұхамбетов дәрі-дәрмектер мен медициналық мақсаттағы бұйымдарды тұрақтандыру қорының қоймасын қарап шықты.
Облыс әкімі бұдан былай дәрі-дәрмектер мен басқа да медициналық мақсаттағы бұйымдарды жеткізу тұрақты түрде жүзеге асырылатынын атап өтті.
– Біздің басты міндетіміз – азаматтардың денсаулығын сақтау. Қажетті дәрі-дәрмектермен қамтамасыз ету мәселесін түбегейлі шешу, дәрі-дәрмектердің мол қорын құру, – деді Махамбет Досмұхамбетов.
Жалпы, Атырау облысының дәріханаларына соңғы үш аптада 100 тонна дәрі-дәрмек жеткізілді. Жуырда 40 тонна аса қажетті дәрі-дәрмек жеткізілетіні де мәлім болып отыр.
Бұған дейін Атырау облысының әкімі Махамбет Досмұхамбетовтің тапсырмасына сәйкес құны 30 миллион теңгені құрайтын, дәрігер рецептсіз берілетін дәрі-дәрмектер облыс халқының әлеуметтік аз қамтылған топтарына тегін таратылған болатын.
Дәрі-дәрмектер Атырау қаласы мен облыстың жеті ауданындағы 3 мың отбасына тегін таратылды. Отыз түрлі дәрі-дәрмек салынған пакетті таратып, жеткізуге елуге жуық авто-ерікті мен «Jаs Оtan» Жастар қанатының еріктілері қатысты. Қажетті дәрі-дәрмектер салынған пакеттер әлеуметтік аз қамтылған 7 категорияға берілді. Атап айтқанда, аса мұқтаж жандарға, көпбалалы және табысы аз отбасыларға, бірінші топ мүмкіндігі шектеулі жандарға, ерек-ше балалары бар отбасылар, төмен зейнетақы алатын және әлеуметтік аз қамтылған топқа кіретін зейнеткерлер, жетім балалар, тыл еңбеккерлері мен Екінші дүниежүзілік соғысқа қатысқандар мен оларға теңестірілгендерге берілді. Бүгінде тұрғындардың дәрі іздеп дәріханалар алдында кезекке тұруы байқалмайды. Бірақ бұл да жергілікті тұрғындардың дәрі-дәрмекке деген сұранысы біржолата шешімін тапты дегенді білдірмейді. Сондықтан дәрі-дәрмек қорын толықтыруда жергілікті атқарушы билік мәселені оң шешуді қолға алды. Бұл алдағы күз-қыс айларында халықты аман сақтап қалудың алғышарты екені сөзсіз.
Тұрсын ЖҰМАБЕКҚЫЗЫ,
Атырау облысы
