Жиын кезінде ең алдымен партия хатшысы праймериздің мақсаттары мен міндеттеріне баса назар аударды. Ол бірнеше жыл бұрын Елбасы – «Nur Otan» партиясының Төрағасы Нұрсұлтан Назарбаевтың партиясының XIV съезінде түрлі салада өзгерістер әкелуі тиіс бес институционалды реформаны жариялағанын еске алды.
– Бұл сұрақтардың бәрі бес жыл бұрын көтерілген болатын. Біз қазір осы бес институционалды реформаны жүзеге асыру мақсатында партияішілік праймериз өткізіп отырмыз. Партияға Елбасының нұсқауларын ары қарай іске асыра алатын, проблемаларды ашық түрде көтеріп, шеше алатын мықты көшбасшылар қажет. Осы ретте партияның негізгі міндеті – ел өміріне белсене араласатын көшбасшылар мен партия мүшелерін тағайындау, – деді Жігер Қалиев.
Отырыста білім беру саласында еңбек ететін партия мүшелері ұсыныс-пікірлерін ортаға салды. Сондай-ақ бейнеконференцияға қатысушылар белсенді түрде сұрақтарын қойып, праймеризді ұйымдастыру мәселелеріне де қызығушылық танытты. «ҚазИИТУ» ғылыми-білім кешенінің тәрбие беру-әлеуметтік жұмыстар жөніндегі проректоры Аида Маратова коронавирус пандемиясын ескере отырып, үгіт-насихат жұмыстарын қалай жүргізуге болатыны жөнінде сауалын қойды. Сондай-ақ ол сөз арасында үгіт-насихат жұмыстары барысында халықпен түрлі кездесу өткізудің маңыздылығына тоқталып, кейбір шалғай елді мекендерде әлі күнге интернет қосылмағанын айтып, бұл ретте оларға қандай жағдай жасалынатынын сұрады.
Әлеуметтік желідегі парақшасында «Nur Otan» партиясы Төрағасының Бірінші орынбасары Бауыржан Байбек еліміздің бас мемлекеттік санитарлық дәрігерімен бірге праймериз өткізу кезінде арнайы санитарлық-эпидемиялық талаптарды енгізу туралы Жарлық қабылданғанын атап өткен болатын. Барлық ұйымдастыру комитеті, кандидаттар мен сайлаушылардың өздері осы ескертпелерді басшылыққа алуы керек. Партияішілік іріктеуге қатысушылар бетперде, қолғап, дезинфекциялық құралдарды қолдануға, әлеуметтік қашықтықты сақтауға және тікелей байланыстың барлық түрінен аулақ болуға міндетті.
Праймериздің үгіт-насихат кезеңі қыркүйек пен қазан айында болатынын және бұл кезде Денсаулық сақтау министрлігі пандемияның екінші толқыны жүретінін болжағанына қарамастан, партия праймеризге мұқият дайындалуда және барлық шараларды қабылдауға дайын. Осылайша, үгіт-насихаттың түрлі форматы, оның ішінде онлайн үгіт-насихат, онлайн пікірсайыстар өткізу қарастырылды. Халықпен кездесулер барынша қауіпсіздік шараларын сақтау арқылы өткізіледі: медициналық бетперде тағу, санитарлық нормаларға сәйкес адамдардың санын шектеу, әлеуметтік қашықтықты сақтау және тағы басқалар.
Партия хатшысы Жігер Қалиев праймеризге қатысушылар сайлауалды бағдарламаларында неғұрлым өзекті мәселелерді көтеруі керек екенін ерекше атап өтті. Ал өз кезегінде «Ертіс» жоғары аграрлық-инновациялық колледжінің директоры Серік Жартыбаев ауылдық жерлерде жас мамандарды баспанамен қамтамасыз етуге қатысты мәселені көтерді. Ол қазіргі кездегі «Дипломмен – ауылға!» жобасы мұғалімдерді және мемлекеттік ветеринарлық инспекторларды жұмысқа алуға үлкен мүмкіндік беретінін айтты.
Жиын соңында №17 мектеп-гимназиясының директоры Рамзия Умербаева, «Саран» техникалық колледжінің директоры Меруерт Мамирова, М.Әуезов атындағы Оңтүстік Қазақстан мемлекеттік университетінің ректоры Дария Қожамжарова және тағы басқа конференцияға қатысушылар праймериз төңірегінде ұсыныс-пікірлерін айтып, «Nur Otan» партиясының партияішілік сайлауы мемлекет пен қоғамның дамуында маңызды рөл атқаратынын тілге тиек етті.
