2020 жыл еліміз үшін үлкен сынақ жыл болды. Коронавирус пандемиясы біздің өмірімізді, басымдықтарды өзгертті, бұл көптеген мәселеге басқаша қарауға мәжбүр етті. Біз басты құндылық – адамның өмірі мен денсаулығы екенін түсіндік.
Бүгінде қазақстандықтар партиядан нақты мәселелерді шешуді және бастамаларды ілгерілетуді күтеді. Ол үшін партия жүйелі партиялық қайта жаңғыртуды және партия ішіндегі ашық сайлау – праймериз өткізуді ұсынған. Соған сәйкес, «Nur Otan» партиясының облыстық филиалдары өздерінің сайлауалды бағдарламаларын жариялаған болатын. «Nur Otan» партиясының атыраулық филиалы да сайлауалды бағдарламасы мен даму жобасын жасақтады.
«Nur Otan» партиясының Атырау облыстық филиалы төрағасының бірінші орынбасары Н.Ожаевтың пікірінше, аймақтағы негізгі шешімін күттірмейтін мәселелер қатарында: мұнай сервистік компанияларда жұмыс көлемі азаюына байланысты жұмыссыздық деңгейінің көтерілу қаупі; өңірдің денсаулық сақтау саласындағы ана мен бала өлімінің өсуі; аймақ экологиясының халықтың денсаулық жағдайына теріс әсер етуі; облыс бойынша тозығы жеткен және апаттық жағдайда көпқабатты үйлер санының өсуі; үш ауысымда оқытатын мектептің болуы, мұғалімдер мен дәрігерлердің тапшылығы тұр.
Аймақтағы осы өзекті проблемаларды шешу жолдары мен механизмдері «Nur Otan» партиясы Атырау филиалының сайлауалды бағдарламасында анық көрсетілген. Бағдарлама негізінен тұрғындарды толғандыратын мәселелерді шешуге бағытталып отыр.
Атырау облысын дамытудың басым бағытының негізінде –экономикалық тұрақты аймақ құру, экологиялық мәселелерді шешу, жастар мәселесі, ашық және есеп беретін жергілікті атқарушы органдар мәселесі және қауіпсіздік мәселелері тұжырымдалған. Бүгінде облыстың экономикалық тұрақтылығы өндіріс, ауылшаруашылық, құрылыс және сауда саласын дамыту арқылы жүзеге асырылуда.
«Nur Otan» партиясы атыраулық филиалының жұмысы әр атыраулықтың өзіне және өз отбасына лайықты өмір сүру деңгейін қамтамасыз етуі үшін тұрақты жұмыс орындарының санын ұлғайтуға ықпал етіп отыр. Сонымен бірге сайлауалды бағдарламада Атырау ауыл тұрғындарының табысын арттырып, азық-түлік қауіпсіздігін қамтамасыз етуге де басты назар аударылған. Ал өлкедегі шағын және орта бизнесті дамыту өңір экономикасының өсу резервінің бірі саналады. Мәселен, 2019 жылдың қорытындысы бойынша, облыста кәсіпкерлік көрсеткіштерінің оң динамикасы байқалды. Облыстың жалпы өңірлік өніміне шағын және орта бизнестің үлесі артуда. Алайда Атырауда COVID-19 індетінің таралуы және оның салдары бизнестің экономикалық белсенділігінің төмендеуіне айтарлықтай әсер етті.
Экономиканың көлік және сақтау, жылжымайтын мүлік, қонақүй бизнесі, қоғамдық тамақтану сияқты секторлары ең көп зардап шекті, олар өңір экономикасының 22,4 пайызын құрайды.Төтенше жағдай кезінде облыс аумағында 23 мыңға жуық адамы бар 11 мың шағын және орта кәсіпкерлік субъектілері өз қызметін тоқтатты. Сондықтан да «Nur Otan» партиясының атыраулық филиалының сайлауалды бағдарламасында облыстағы неғұрлым зардап шеккен бизнес субъектілерінің қызметін қалпына келтіріп қана қоймай, «Атамекен» ҰКП-мен бірлесіп мемлекеттік қолдау және ынтымақтастықтың өзге де тетіктерін пайдалану арқылы кәсіпкерліктің жаңа нысандарын құру үшін жағдай жасайтыны айтылған. Сайлауалды бағдарламаға сәйкес, «Nur Otan» партиясының облыстық филиалы азаматтардың өмір сүру сапасын жақсартуды, әркімнің таза суға, ауа мен сапалы жолдарға қолжетімді болуын қолдап отыр. Облыс халқының қолайлы өмір сүру деңгейін жақсарту үшін партия ауызсу, тұрғын үй-коммуналдық шаруашылығы инфрақұрылымын жақсартуды қолға алады. Бағдарлама білім, денсаулық сақтау және әлеуметтік саладағы сапалы қызметтерге қолжетімділікті қамтамасыз ету арқылы облыс тұрғындарының өмір сүру жағдайын жақсартуға күш салуды өзінің басты басымдылықтары ретінде белгілеп отыр. Сондай-ақ өңірде ерекше қажеттілігі бар адамдар үшін кедергісіз орта құруға ерекше назар аударылған.
Партия алдағы 5 жылда облыс тұрғындарының денсаулығын нығайтуға, оларды бұқаралық спортпен шұғылдануға тартуға барлық жағдай жасайтынын мәлімдеді.
Сайып келгенде, «Nur Otan» партиясы партияішілік праймеризді жария ете отырып, қазақстандықтарды барлық сындарлы және саналы қоғамдық күштерді топтастыруға жаңа қадам жасады.
Сайпулла САПАНОВ,
Х.Табылдиев атындағы Атырау өңірінің тарихы,
археологиясы және этнографиясы
ғылыми-зерттеу орталығының директоры
