Дебатқа жеребе арқылы анықталған 6 үміткердің 4-еуі ғана қатысты. 2 үміткер отбасылық жағдайына байланысты кейін қатысатын болды. Додаға облыстық партия филиалының төрағасы, облыс әкімі Гүлшара Әбдіқалықова арнайы қатысып, қатысушыларға сәттілік тіледі.
– Бұл праймериз – нағыз мықтыларды анықтайтын дода. Елбасы – «Nur Otan» партиясының Төрағасы Н.Назарбаев праймеризді әділ әрі жоғары деңгейде өткізуді тапсырған болатын. Праймеризге қатысушылардың барлығы елдің ертеңіне сеніммен қарайтын нағыз майталмандар деп үміттенемін. Баршаңызға саяси додада сәттілік тілеймін, – деді ол.
Жария пікірсайыс ашық әрі жоғары деңгейде өтті. Әрбір үміткер 5 минут ішінде бағдарламалары мен өзекті мәселелердің шешілу жолдарын баяндаса, екінші бөлімде сұрақ-жауап арқылы пікір алмасты.
Өңірдің ахуалын жіті зерттеген үміткерлер бағдарламаларына түрлі мәселелерді арқау еткен. Бірі коммуналдық қызметтерге қатысты тарифтерді арзандату, білім саласын цифрландыру мәселесін алға тартса, енді бірі әрбір өңірдің ерекшеліктерін ескере отырып, ауыл шаруашылығы өнімдерін сақтайтын қойма салу, аналар мәртебесі туралы заң қабылдау, мүмкіндігі шектеулі азаматтарды жан-жақты қолдау және оларды «Қайсар жандар» деп атау секілді ұсыныстарды ортаға салды.
Қызылорда облысы бойынша жалпы праймеризге 502 үміткер тіркелсе, бүгінгі күнге 47 дебат ұйымдастырылып, олардың 248-і жария пікірсайысқа қатысты. Аталған жария пікірсайыстар партия филиалдарының ресми аккаунтында тікелей эфирде көрсетілуде.
Естеріңізге сала кетейік, жария пікірсайыс 14 қыркүйекте басталып, 28 қыркүйекте аяқталады. Осы мақсатта «Nur Otan» партиясы Қызылорда облыстық филиалы тарапынан дауыс беруге және дебаттарды өткізуге арналған 133 орын белгілеген. 1-3 қазан аралығында үміткерлерге дауыс беріледі. Оған «Nur Otan» партиясының Қызылорда облыстық филиалының 43 мыңнан астам мүшесі қатысады деп жоспарлануда. Олар 239 бастауыш партия ұйымына біріккен.
