– Осы таңға дейін қанша ескертсек те, тығылып той жасап келгендер болды. Алайда күні кеше тағы 12 жаңа мобильді топ құрылып, енді тексеріс жұмыстары күшейтілетін болады. Бұл менің шығарып отырған бұйрығым емес. Коронавирус індеті әлемдік пандемия сипатын алғандықтан, барлығымыз тәртіпке бағынуымыз керек. Сонда ғана өзіміз бен жақындарымыздың өмірін қорғай аламыз. Өздеріңіз көріп отырғандай, мектептер де белгілі шектеумен жұмыс істеп жатыр. Егер бәрі жақсы болса, неге балаларымызды мектепке бермейміз? Осыдан-ақ түсінсеңдер болады. Сондықтан арқаны кеңге салмай, барша бизнес өкілдерін тәртіпке бағынуға шақырамын, – деді қала әкімі.Жиында мейрамхана иелеріне де сөз беріліп, олардың дені тойхана жұмысын тоқтатпауды, 80 адаммен үш сағаттық кештер өткізуге рұқсат сұрады. Алайда қала басшысы бұған рұқсат жоқ екенін бірден айтты. Енді бір тойхана иесі өздері дәрігер жалдап, қонақтарды жіті тексеруден өткізе алатындарын ұсынғанымен, қала әкімі оған да рұқсат берілмейтінін жеткізді. «Енді бала-шағаны қалай асыраймыз?» деген бизнес өкілдеріне болса, Айтқазы Қарабалаев тойхананы түнгі сағат 00.00-ге дейін жұмыс істейтін кафе үлгісіне ауыстыруды ұсынды. Немесе қала әкімдігіне келсе, жұмыспен қамту бағдарламасы бойынша басқа жұмыс тауып беруге дайын екендерін жеткізді.
С. САТЫЛҒАН