Интернет-алаяқ Петропавл тұрғынының депозитінен миллион теңгеден астам ақшасын сыпырып алған. 25 жастағы бойжеткеннің құрбысы жатын бөлмеге арналған жиһазын OLX арқылы сатып жібермек болады. Жарнамаға орай бір әйел WhatsApp арқылы хабарласып, төлемді аудару үшін оның картасының нөмірін сұрайды. Ізінше қайта хабарласып, «сатушының картасы ақша аударуға жарамай жатқанын» айтады. Кейін анықталғандай, ол картаға алаяқтар ұрлайтындай қомақты ақшасы бар есепшот тіркелмеген болып шықты. Қаскөйлер тиісінше, одан бас тартқан.
Содан сатушы қыз тиісті төлем аударылуы үшін дос қызына жүгініп, оның картасын пайдалануға рұқсат сұрайды. Ол келіседі. Біраздан соң «сатып алушы» жәбірленушімен байланысқа шығады. –Аңғал бойжеткен оған картасының барлық дерегін, жеке басына қатысты мәліметтерді, ЖСН, тіпті біраз уақыттан соң телефонына түскен SMS хабарламадағы кодты хабарлап қойған. Кейін депозиттен 1 миллион 300 мың теңге көлеміндегі қаражаты жоғалғаны анықталды, – дейді Криминалдық полиция басқармасының бастығы Петр Климов. Алаяқ «жеке тұлғаларға арналған интернет-банкинг» және «SMS-парольдерді жеткізу» қызметтерін пайдаланып, жәбірленушінің банк шотындағы барлық ақшасын басқа шоттарға аударып алған. Қыз алданғанын тек жинағы жоғалғанда ғана түсінеді. Дереу полицияға жүгірген. Сұм әзірге ұсталмады. Осы жылдың басынан бері СҚО-да 375 интернет-алаяқтық фактісі тіркелді. Интернетте 100-ден аса хабарландыру бұғатталды.Елдос СЕНБАЙ