Жылдың алғашқы бірер айында барлық деңгейдегі әкімдердің халықпен есеп беру кездесуі өтетін дәстүр бар бізде. Биыл да облыс, қала аудан, елді мекен әкімдері сол дағдыдан жаңылған жоқ. Жуырда Нұр-Сұлтан қаласының әкімі елорда тұрғындарымен есеп беру кездесуін өткізді. Қала әкімі Алтай Көлгінов бас шаһарда бір жыл ішінде атқарылған жұмыстар мен алдағы жоспарларды баяндап, тұрғындардың сауалдарына жауап берген еді.
Әлбетте, алып қаланың шаруашылығын шырқ үйіріп әкету оңай іс емес. Оның үстіне, сол қалаңыз ел астанасы болса, жауапкершілік тіптен ауыр болады. Мұны қала әкімі жақсы сезінсе керек, тұрғындармен кездесуде қала тіршілігіне қатысты көптеген мәселені бүге-шігесіне дейін баяндауға тырысты. Қаланың абаттануы, көпірлер мен жолдарды жөндеу, саябақтар, өркениет игіліктері, инвестиция, тұрғын үй шаруашылығы, мектеп салу, қаланы газдандыру, цифрландыру, экология қатарлы көптеген мәселе назардан тыс қалған жоқ.76 гектар жер абаттандырылып, 173 көше жөнделді
Айталық, Алтай Көлгіновтің сөзіне қарағанда былтыр қалада 76 гектар аумақ абаттандырылған. Сөйтіп, елордадағы бос жерлер, қараусыз қалған учаскелер мен батпақты аумақтар саны біршама азайды. «Елорданы «Нұр-Сұлтан – қолайлы қала» жоспары аясында дамытып жатырмыз. Қала ыңғайлы және қолайлы болу үшін, тек былтыр ғана 150-ден астам аула мен 60 қоғамдық кеңістікті (сквер, бульвар, саябақ) абаттандыру бойынша ауқымды жұмыстар атқардық», – деді Алтай Көлгінов. Оның сөзіне қарағанда, абаттандырылған аула аумақтары, саябақтар, скверлер мен бульварлар санының артуы көптеген тұрғынды спортпен айналысуға, балаларды жастайынан денсаулығын күтуді үйретеді. Әрі бұл бағыттағы ауқымды жұмыстар жалғасады. Одан бөлек, былтыр қалада 2 көпір салынып, 173 көше жөнделген. Әрі бұл жұмыстар азаматтарды еңбекпен қамтуға да ықпал етіпті. Жол жұмыстарын жүргізуге «Жұмыспен қамтудың жол картасы» бағдарламасы біршама көмектесіп, ол бойынша 15 мыңнан астам жұмыс орны ашылды. Сонымен қатар елордада жұрттың назарына жиі ілігетін нөсерге арналған кәріздердің тазалығына да көп көңіл бөлінсе керек. Қазір қалада 3 ірі нөсер кәрізінің құрылысы мен тазарту құрылысы жүргізілуде. «Құрылыстың қарқынын ескере отырып, сонымен қатар нөсер канализациясының жүйесімен де уақытылы айналысып отыру қажет. Қаладағы проблемалы орындардың бірі – Б.Момышұлы учаскесі. Онда нөсер канализациясының магистральды коллекторының құрылысын аяқтаймыз. Аталған нөсер канализациясының ұзынды 500 метрді құрайды. Бұл қолданыстағы нөсер канализациясы желісінің өткізу қуатын бір жарым есеге арттыруға мүмкіндік береді», – деді А.Көлгінов. Әкім «Жастар» ықшамауданындағы коллекторларға реконструкция жасап, тазарту құрылысы жүргізілетінін, ал «Тельман» тұрғын алабындағы магистральды коллектор мен тазарту қондырғысы жұмыстарының аяқталғанын атап өтті. Бұдан бөлек, 2020 жылы тазарту құрылыстары «Пригородный» тұрғын алабы мен Алаш тас жолының бойындағы логистикалық ауданда да жүргізілді. 2019 жылы «Мыңжылдық» аллеясы аумағындағы екі учаскеде нөсер канализациясының мәселесі шешілді.Газдандыру қарқынды жүріп жатыр
Соңғы жылдары елорда экологиясына қатысты түрлі сын жиі айтылады. Әсіресе, қыста қаланы түтін басатыны бар. Әрине, мұндай жағдайдың қалыптасуына қаладағы көліктің көптігі мен жеке тұрғын үйлердің көмір жағуы әсер еткені белгілі. Сондықтан астанада газдандыру жұмыстары маңызды болып тұр. Былтыр қаланы газдандыру басталып, жаңа жылыту маусымында Теміржол, Көктал-2 тұрғын алаптарының тұрғындары, Агроқалашықтың бір бөлігі газға көшу мүмкіндігіне ие болды. Қазір Көктал-1, Өндіріс, Оңтүстік-Шығыс тұрғын алаптарында құрылыс-монтаж жұмыстары жүріп жатыр. 300 шақырым газ тарату желілері салынды. Бұған қоса, елорда әкімі жекеменшік ұйымдардың өкілдерімен бірнеше рет кездесудің арқасында үйдің ішіне газ тарту құнын орташа алғанда 30%-ға төмендету мүмкін болғанын айтты. «Көмірден газға көшудің артықшылығы көп: тұрғындарға көмір сатып алу, сақтау, оның сапасы, күніне бірнеше рет пеш жағу жайлы ойлаудың қажеті болмайды. Қала экологиясы жақсарады, бұл әрине қалалықтарға оң әсер етеді. Газдандыру зиянды қалдықтардың атмосфераға тарауын бірнеше есе азайтуға мүмкіндік береді. Бұған қоса, ЖЭО-1 және ЖЭО-2 қазандықтарының бір бөлігі газға ауысты», – деді Нұр-Сұлтан қаласының әкімі Алтай Көлгінов. Еске салсақ, тұрғын алаптарына газ тарату желілерін салу, оның ішінде үй маңындағы кварталішілік желілерді салуды қала әкімдігі өз мойнына алған. Ал желіні үйдің ішіне жүргізумен жеке ұйымдар айналысады.Қалаға 1,1 триллион теңге инвестиция тартылды
Ел астанасы әу бастан-ақ инвестициялық тұрғыда тартымды қалаға айналған болатын. Былтыр тіпті коронавирус пандемиясына қарамастан, елорда әкімдігі азаматтар мен қала үшін маңызды жобаларға 1,1 трлн теңге жеке инвестицияларды тарта білді. Бұл 2019 жылға қарағанда 21,5 пайызға артық.
«Өткен жыл оңай болмады. Бірақ пандемияның уақытша екенін түсіну керек. Қалада тұрғын үй мен әлеуметтік нысандарды, инфрақұрылым және тағы басқаларын салуды міндетті түрде жалғастыру қажет. Карантин кезінде құрылыс жұмыстары тоқтаған жоқ. Жұмыстар санитарлық норманы қатаң сақтау арқылы жүргізілді. 2020 жылы елордада 3 млн шаршы метр тұрғын үй салынып, пайдалануға берілді. Бұл 2019 жылға қарағанда екі есеге көп». деді әкім.
Өткен жылы ModeX үй комбинатының жұмысы іске қосылды. Үй комбинаттары тұрғын үй құрылысына көмектеседі: құрылыстың уақытын қысқартуға, тұрғын үй құнын төмендетуге, үй сапасын арттыруға мүмкіндік береді.
Инвестиция тарту жөніндегі өңірлік кеңестердің өздері онлайн режимге көшті. Инвестициялық 16 отырыста 110 жобаны мақұлдады.
5 жылда 50 мектеп салынады
Нұр-Сұлтан әкімдігі мектеп құрылысы бойынша жұмыстарды жүйелі жүргізуде. Өйткені білім сапасын жақсарту үшін жағдай жасау өте өзекті. Тұрғындар санының өсуіне байланысты мектепке деген сұраныс азаймақ емес. Ал былтыр салынған жаңа мектептер үш ауысымды мектептер санын 8-ден 4-ке қысқартуға мүмкіндік берді. «2021 жылы 15 ірігабаритті мектептер салатын боламыз. Бұл 40 мың орын ашуға мүмкіндік береді», – деді елорда әкімі Алтай Көлгінов. Оның сөзіне қарағанда, 5 жылдық кешенді жоспар аясында 50 мектептің құрылысын жүргізілмек екен. Бұдан бөлек, елорда әкімі Алтай Көлгінов қолданыстағы білім ошақтарының күтіміне де тиісті көңіл бөлу керек екенін атап өтті. Өткен жылы 26 білім нысанына жөндеу жұмыстары жүргізілді (мектептер, балабақшалар, колледждер). Бұл жұмыстар биыл да жүйелі түрде жалғасатын болады Сонымен қатар мектептерді орталықтандырылған жылу жүйесіне көшіру, балаларды бейімделмеген ғимараттарда оқытуды доғару тәрізді мәселелер шешіліп жатыр.Елорда – игіліктер мекені
Жалпы, астана әкімінің халықпен есептік кездесуінен мемлекеттік бағдарламалар алдымен осы қалада орындалатынын түйдік. Ол заңды да. Өйткені Нұр-Сұлтан қаласы өңірлерге үлгі болуға тиіс. Үкімет қабылдаған кез келген бағдарлама алдымен осы қалада жүзеге асырылады. Айталық, Президент Қ.Тоқаевтың «Халық үніне құлақ асатын мемлекет» бағдарламасына сәйкес, қала әкімдігі тұрғындардың арыз-арманын тыңдауға ерекше көңіл бөлген. Былтыр қала әкімдігінің қызметкерлері 10 мың азаматты қабылдапты. Ал жыл басталғалы бері Алтай Көлгіновтің өзі, орынбасарлары мен аудан әкімдері 500-ге жуық тұрғынды қабылдап, өтінішін тыңдаған. Ал тұрғын үй саласы бойынша қызмет көрсететін орталық пен әлеуметтік көмек беру мақсатын көздейтін «Жанұя» орталығына ашылғаннан 45 мың азамат жүгініп, онда 65 мың мәселе бойынша жұмыс қолға алынған. Одан бөлек, қалада былтыр 7 мың әлеуметтік пәтер салыныпты. Егер 2018 жылы 1 100, 2019 жылы 2 900, 2020 жылы 7 мыңнан аса әлеуметтік пәтер берілсе, биыл бұл сан 10 мыңға жетпек. Елорда әкімінің тапсырмасымен тұрғын үй сертификаттарының сомасы 1 млн теңгеден 1,5 млн теңгеге дейін артты. Қалада қазір 100 электроавтобус жолаушы тасымалдап жүр. Осындай тағы 100 экоавтобус шығару жоспарланып отыр. Білім, денсаулық сақтау және әлеуметтік көмекке қосымша 10,5 млрд теңге, экономиканың және инфрақұрылымның нақты секторын қолдауға 25,7 миллиардтан астам теңге бөлінді. Қысқасы, елорда әкімдігі халықтың тұрмыс-тіршілігін жақсарту, әлеуметтік мәселелерді шешу, қаланы дамыту бағытында жақсы қызмет көрсетіп келеді. Бұл үрдіс жалғаса берері сөзсіз.Ардақ СҰЛТАН